Салат, шўрва ва бошқа таомлар тайёрлаш мумкин бўлган карам фойдали моддаларнинг кони ҳисобланади. Кунлар совишни бошлаши билан ушбу витаминларга бой сабзавот тузланган ҳолда рациондан ўрин олади. Карам тузланганда қандай жиҳатлари билан фойдали ҳисобланади ? Қуйида ушбу саволга жавоб берамиз.
Витамин ва озуқавий моддаларнинг манбайи
Тузланган карам B, K, U, A витаминларининг кони экани сабаб ҳам у бир қанча касалликларнинг олдини олиш хусусиятига эга.
Шифокорлар томонидан коронавирус профилактикаси ва уни даволаш учун қабул қилиш тавсия қилинаётган C витамини карамда лимондан кўра кўпроқ бўлади. Тузланганда эса ушбу витамин камаймайди, аксинча фойдалилик хусусиятлари янада ошади. Бундан ташқари, саломатлик учун аҳамиятли бўлган калий ва клетчаткани ҳам ўз ичига олади. Калий юрак саломатлиги касалликларини олдини олади, клетчатка эса холестеринни камайтиради.
Маълумот учун, авваллари пробиотикларга бой тузланган карам ичаклар микрофлораси тикланиши учун беморларга шифокорлар томонидан тавсия қилинган.
Яра касалликларига қандай таъсир кўрсатади?
Кўпчилик тузланган карамни гастрит ва ошқозон ярасидан азият чекканлар учун айни муддао деб ҳисоблайди. Аслида ҳам шундайми? Бир томондан қараганда, карамда ошқозон шиллиқ деворларини битириш хусусиятига эга U витамини мавжуд. Иккинчи томондан эса карам ошқозонни зўриқтириши, клетчатка газ ҳосил бўлиши ҳамда ошқозон суюқлигининг ортишига сабаб бўлиши мумкин. Шу сабабдан ҳам ошқозонида яра бор беморларга эҳтиёткорлик билан истеъмол қилиш тавсия қилинади.
Озишга қандай таъсир кўрсатади?
Карам вазн ташлашни истаганларнинг энг севимли маҳсулоти, нордон ҳолда эса унинг калорияси янада кам бўлади. Парҳезшунослар карамни тозалаш хусусиятига эга маҳсулот сифатида тавсия қилади.
Гўзалликка таъсири
Ушбу нордон маҳсулотда аёллар организми учун фойдали бўлган элементлар: ёд, сочларни ялтиратиш, тирноқларни мустаҳкамлаш хусусиятига эга никотин кислотаси мавжуд. Ажабланарлиси, ундан юз учун косметик ниқоб тайёрлашда ҳам фойдаланилади. Бундай ниқоб терини намлантиради, тозалайди ва тонусни оширади.
Кимларга тузланган карам ейиш ман қилинади?
- Қалқонсимон без ва ошқозон ости бези безовта қиладиган кишиларга;
- Гипертония, буйрак етишмовчилигидан азият чекадиганларга;
- Ўт пуфагида тош бор беморларга;
- Ошқозон ва ўн икки бармоқли ичак яраси касаллиги бор кишиларга тузланган карам ейиш мумкин эмас.
Изоҳ (0)