Инсон танасида пайдо бўлувчи сўгал ва папилломалар хавфсиз бўлиб, улар фақатгина кўзга ташланиши ва ҳаракат ёки кийим алмаштириш жараёнида ноқулайликлар туғдириши мумкин. Уларнинг пайдо бўлишига сабаб одам папиллома вирусидир, ушбу вирус ҳар бир организмда бўлиб, қачонки иммунитетнинг пасайиши кузатилганда, у ўзини намоён қилади. Шунинг учун муаммо нафақат ташқи томондан, балки ички тарафдан ҳам бартараф этилиши керак. Олдиндан пайдо бўлган сўгал ва папиллома дори воситаларини қабул қилиш ёки иммунитетни мустаҳкамлаш билан йўқолиб кетмайди. Бунинг учун уларни шифокор назорати остида олдириш керак.
Сўгал – тананинг очиқ жойларида пайдо бўлади, уни олиб ташлаш қийин. Ҳажми – 2-10 миллиметр. Камдан-кам ҳолларда сўгаллар ўз-ўзидан йўқолиб кетиши мумкин.
Папиллома – тананинг терлаш қисмида, тери бурмаларида пайдо бўлади. Катталиги – 0,2-1,0 миллиметргача ўсади. Папилломалар фақат олиб ташлаш йўли билан йўқотилади.
Криодеструкция
Криодеструкция жараёнида тўқималарга 100-180 даражагача жуда паст ҳарорат билан таъсир қилинади. Жарроҳ томонидан суюқ азот муаммоли жойга юборилади ва бироз кутилади. Суюқлик кераксиз тўқималарни ўлдиради ва сўгал илдизни олиб ташлайди. Жараённинг хавфли томони шундаки, препарат таъсирининг чуқурлигини назорат қилишнинг иложи йўқ ва бу ҳолатда соғлом тўқималарга ҳам зарар етиши жуда осон. Жараёндан сўнг терининг муаммоли қисмида пуфакча пайдо бўлади ва икки кундан кейин йўқолади. Криодеструкция папилломаларни олиб ташлаш учун мос келмайди, у кафт ва оёқ тагидаги сўгалларни олиш учун қўлланилади.
Электрокоагуляция
Ушбу жараён аввалги усулдан фарқли бўлиб, бунда юқори ҳарорат орқали терига таъсир қилинади. Жарроҳ махсус учли мослама билан ишлайди, бу эса ҳар бир папилломани олиб ташлашга ёрдам беради. Юқори ҳароратда юборилган оқим тўқималарни ўлдиради ва ўсишни тўхтатади. Таъсир қилинган тери қисмида қобиқ қолиши мумкин, у ҳафта ўтиб аста-секин йўқолади. Жараёндан сўнг шифокор буюрган вазифаларга амал қилиш зарур, қобиқни тозалаш ва сувлаш мумкин эмас. Яхши томони шундаки, ушбу жараённи амалга ошириш кўп маблағ талаб этмайди. Юздаги сўгал ва папилломалар учун қўллаш мумкин эмас, сабаби юзда чандиқ қолиши мумкин.
Лазер ёрдамида олиб ташлаш
Лазер сўгал ва папилломаларни олиб ташлашнинг энг замонавий ва тезкор усули ҳисобланади. Лазер нурлари жуда аниқ ишлаган ҳолда тўқималарни қиздиради ва йўқ қилади. Жараён мобайнида жарроҳ чуқурликни назорат қила олади ва танага бошқа жиҳатдан ҳеч қандай зарар етмайди. Шунингдек, жараён нисбатан оғриқли бўлганлиги учун оғриқсизлантирувчи восита қўлланилади. Афсуски, ушбу жараённи амалга ошириш бироз кўпроқ маблағ талаб этади. Бундан ташқари иш жараёнида тери куйганлиги туфайли ёқимсиз ҳид пайдо бўлади. Лекин лазер ёрдамида юз, шиллиқ пардалар, кўз атрофи ва қовоқдаги ҳар қандай сўгал ва папилломадан халос бўлиш мумкин. Фойдали жиҳати шундаки, лазер тери юзасида ҳеч қандай чандиқ қолдирмайди, шундай бўлсада, жараён амалга оширилган қисм икки ҳафтагача намланмаслиги, тозаланмаслиги ҳамда қуёш нурида тобланмаслиги зарур.
Изоҳ (0)