Ошқозон ости бези безовта қиладиганларга ейиш тавсия қилинадиган маҳсулотлар

Ҳазм жараёнида аҳамиятли бўлган ошқозон ости бези — глюкагон, соматостатин, полипептидлар ва инсулин гормонларини ишлаб чиқарилишида муҳим роль ўйнайди. Шунингдек, ундаги ферментлар ошқозондаги кислотали муҳит ҳамда ичаклар фаолиятини яхшилайди. Унинг саломатлиги билан боғлиқ муаммолар кузатилмаслиги учун шифокор кўригидан ўтиб туриш керак. Шунингдек, таомномага қуйидаги маҳсулотларни киритиш ҳам самара беради.

Брокколи

Флавоноидга бой бўлган ушбу маҳсулот ошқозон ости бези ҳужайраларини ҳимоя қилиш хусусиятига эга. Доимий равишда брокколи истеъмол қилган кишиларда ошқозон ости бези саратони кузатилиш эҳтимоли кам бўлади.

Саримсоқ пиёз

Аллиум оиласига кирувчи пиёз ва саримсоқ пиёзлар таркибида яллиғланишга қарши хусусиятга эга аллицин бўлади. У иммун системасини мустаҳкамлайди, вируслар йўқ бўлишида аҳамиятли бўлган Т-лимфоцитларни синтез қилинишини рағбатлантиради ҳамда саратонга қарши таъсир кўрсатади.

Картошка

Картошка таркибидаги бета-каротин унга ёрқин ранг беради. Бета-каротин меъда ости бези саломатлигида муҳим роль ўйнайдиган кучли антиоксидант ҳисобланади. Бошқа оловранг ва сариқ мева-сабзавотлар ҳам бета-каротинни ичига олади. Сабзи, цитрус мевалар ва маккажўхори ҳам шулар жумласидан.

Қизил узум

Ресвератролга бой бўлган узум, яллиғланиш хавфини камайтиради, қон-томирлар шикастланишининг олдини олади. Антиоксидантлар саратон ҳужайраларини ўлдириши мумкин, шу сабаб ҳар куни узумнинг қизил ранглисини истеъмол қилиб туриш тавсия қилинади.

Резаворлар

Черникадан тортиб маймунжонгача бўлган резаворлар таркибида антиоксидантлар юқори бўлади. Ушбу озиқ моддалари меъда ости безини оксидловчи стрессдан яхши сақлайди, шунингдек, саратоннинг ҳам олдини олиши мумкин.

Исмалоқ

Ошқозон ости бези тўғри ишлаши учун Б витамин ва темир моддасига эҳтиёж сезилади. Исмалоқда эса ушбу муҳим моддаларнинг ҳар иккиси бор. Шу сабаб уни таомларга қўшиш ёки салат тайёрлаб истеъмол қилиш керак.

Тофу

Вегетариан парҳезидаги таомларда кўп ишлатиладиган тофу ошқозон ости бези саломатлиги учун муҳим ҳисобланган оқсилнинг кони. Ёғли таомлар ошқозон ости безини ишдан чиқаргани сабаб ҳам тофу ушбу аъзо учун айни муддао, чунки унинг таркибида ёғ миқдори жуда ҳам оз. Юқорида номи тилга олинган маҳсулотлар касалликни енгишда аҳамиятли бўлган иммун тизимини ҳам мустаҳкамлайди.