Ўзбекистон Россиянинг «Лукойл» компанияси олдидаги газ бўйича қарздорлигини мунтазам қоплаб келмоқда. Бу ҳақда энергетика вазири ўринбосари Беҳзод Норматов 6 ноябрь, жума куни бўлиб ўтган матбуот анжуманида маълум қилди, дея хабар бермоқда «Gazeta.uz».
Ўзбекистон 2018 йилда етказиб берилган газ учун «Лукойл»дан 600 миллион доллар миқдорида қарз бўлиб қолгани 2019 йил март ойида маълум бўлган эди. Россия компанияси Қандим—Ҳовузак—Шоди—Қўнғирот ва Жануби-Шарқий Ҳисор лойиҳаларида маҳсулот тақсимотига оид битим (МТБ) шартлари асосида ишлайди.
Қарздорлик Ўзбекистон «Лукойл» қазиб олган газнинг бир қисмини ички бозор учун олиб қолгани ортидан юзага келган, ваҳоланки МТБ шартларида «Лукойл» Ўзбекистонда қазиб олган газининг ҳаммасини экспорт қилиши белгиланган. Ўшанда «Ўзбекнефтгаз» ҳолат юзасидан изоҳ бермаган.
2019 йил июнида Президент Шавкат Мирзиёев Ўзбекистон «Лукойл»дан ички бозор учун ҳар минг куб метр газни 146 доллардан сотиб олиб, аҳолига 40 доллардан сотганини маълум қилган эди. Давлат раҳбарининг тушунтиришича, 100 долларлик фарқ туфайли 600 миллион долларлик қарз вужудга келган.
Шунингдек, Президент маҳсулот тақсимотига оид битимни тузишда мамлакат миллий манфаатлари инобатга олинмаганини танқид қилган эди.
«Қарзга келсак, аввал ҳам айтганимдек, бизнинг, ҳукуматнинг асосий вазифамиз — аҳолини газ билан таъминлаш. Бироқ аҳолига етказиб берилаётган газ нархи ва экспорт қилинаётган газ нархида катта тафовут мавжуд. Шунга қарамай, ўшанда, зарурат бўлганида ‘Лукойлъдан газ сотиб олинган ва ички бозорга йўналтирилган. Нархдаги катта фарқ туфайли қарздорлик вужудга келган», — деди энергетика вазири ўринбосари Беҳзод Норматов жума куни бўлиб ўтган матбуот анжуманида.
Унинг сўзларига кўра, «Лукойл» билан келишилган схема бўйича Ўзбекистон ўз қарздорлигини мунтазам қоплаб келмоқда. «Бу муаммо эмас. Бироқ ҳозир қанча қарз қолган? Буни айтолмайман», — дея қўшимча қилган Беҳзод Норматов.
«Лукойл» ва Ўзбекистон қарздорликни икки йил муддатда ҳар ой тенг миқдордаги тўловни амалга ошириш орқали реструктуризация қилиш ҳамда «Лукойл» мамлакат ички бозорига йилига 5 миллиард метр куб миқдоридаги газни олдиндан тўлов асосида ўртача ҳисобланган экспорт нетбекига нисбатан 12,5 фоизлик чегирма билан етказиб беришга келишиб олган.
Аввалроқ Беҳзод Норматов «Лукойл» 2020 йилда Ўзбекистон ички бозорига тахминан 5 миллиард метр куб газни экспорт нархидан паст қийматда етказиб берганини маълум қилган эди.
Изоҳ (0)