Ёрқин рангдаги либослар барча учун манзур келиши шубҳасиз. Лекин кутилмаганда рўй берган воқеалар туфайли уларга шароб, қаҳва ёки лаб бўёғи доғлари тегиши мумкин. Уларни кетказиш ҳамиша ҳам кийимларнинг аввалги ҳолатини қайтариб бермаслиги мумкин. Қуйида эса уларни бартараф этадиган воситалар ҳақида маълумотга эга бўлинг.
Дезодорант доғлари
Оппоқ кийимлардаги дезодорант доғларини тозалашда истеъмол содаси самарали ёрдам беради. Бунинг учун 1 стакан сувга 1 ош қошиқ истеъмол содаси солиниб, кийимнинг доғли ҳудудига қуйилади. Доғ жуда ҳам сезиларли бўлса, суюқликни тўғридан-тўғри ўша соҳага қуйиш ва 30 дақиқага қолдириш тавсия этилади. Шунингдек, кийим илиқ сувда ювилади. Сўнгра 1 стакан сув 1 ош қошиқ нашатир спирт билан аралаштирилиб, мато намланади. 15 дақиқадан сўнг кийим яхшилаб ювилади.
Тўқ рангли матолар учун 1 стакан илиқ сувга 1 чой қошиқ ош тузи ва 1 чой қошиқ нашатир спирт аралаштирилади. Ушбу эритма билан мато намланади, 15 дақиқадан сўнг кийим тоза сувда ювилади.
Қизил шароб доғлари
Қизил шароб доғларини йўқотиш учун муаммоли соҳа оқ шароб билан ювилади. Қалин қилиб истеъмол содаси сепилади. 2-3 соатдан сўнг доғларнинг ранги ўчиб, кўринмас ҳолга келганидан сўнг илиқ сув билан ювилади.
Лаб бўёғи доғлари
Кийимларга тегиб қолган қизил лаб бўёғини сочга сепиладиган лак билан тозалаш мумкин. Унинг таркибида спирт мавжуд бўлса, албатта, бунинг иложи бор. Лак матога сепилади ва совунли сув билан ювилади.
Қаҳва доғлари
Агар қаҳва оч рангдаги кийим устига тўкилса, дарҳол қоғоз салфетка билан артиб ташлаш зарур. Доғ устига водород перекиси ёки нашатир спирт билан доғлар артилади. Агар бу ёрдам бермаса, матони суюқликка бўктириб, бироздан сўнг тоза сувда ювиш тавсия этилади.
Ёғ доғлари
Агар матони ювиш мумкин бўлса, доғларни ацетон билан артиш мумкин. Бунинг учун пахтада доғларни ташқарига қараб эмас, ичкарига қараб артиш тавсия этилади. Ювиб бўлмайдиган матолардаги ёғ доғларини крахмал йўқотиши мумкин. Бунинг учун крахмал қуруқ товада қиздирилади ва доғ устига сепилади. Кукун мойни ютиб олгандан сўнг доғлар йўқолади. Агар жараён иш бермаса ёки натижа кутилганидек чиқмаса, уни такрорлаш мумкин.
Изоҳ (0)