Боланинг овқат емаслик учун хархаша қилиши деярли барча оналарни безовта қиладиган муаммо ҳисобланади. Бола овқатланишдан бош тортмаслиги учун нима қилиш кераклиги борасида айрим тавсиялар билан бўлишамиз.
Болани овқат тайёрлаш жараёнига қизиқтиринг
Ёши тўғри келиши билан болани турли маҳсулотларни танлаш, жараённи муҳокама қилиш ва улардан овқат тайёрлашга қизиқтиринг. Қандай маҳсулотдан нима тайёрлаш мумкинлиги ва унинг тайёрланиш жараёни қандай бўлиши болада қизиқиш уйғотиши аниқ. Ўзи тайёрламаса ҳам, пишириш давомида кузатиб туришига қўйиб беринг, қизиқиши ортиб, иштаҳаси очилади.
Рационини ўз хоҳишига кўра ўзгартиринг
Бола маълум таомни ейишдан бош тортса, бошқа танлов қилишига қўйиб беринг. Ейишга мажбурламанг, шунчаки тушлик ва кечки овқатга нима таом тайёрлашингиз борасида танлов қилишини айтинг. Гарнирга нима ейишни истаган бўларди, билинг ва шундан келиб чиқиб иш тутинг.
Янги таомлар борасида эҳтиёткор бўлинг
Болалар танлов борасида яхшигина консерватор бўлади. Кун давомида янги нарса ва кўникмаларни ўрганишига тўғри келади ва янгиликни қабул қилиши қийин бўлиши мумкин. Оилавий таомномангизга қандайдир ўзгартириш киритишни истасангиз, масалан, кечки таомга сабзавотли котлет тайёрламоқчи бўлсангиз, яхшиси, бир-икки кун аввал кам миқдорда бошқа таом билан бир вақтда тайёрлаб, овқатланиш вақтида татиб кўришини айтиб, тажриба қилиб кўрганингиз яхши, чунки сиз бор маҳсулотдан сабзавотли котлет тайёрлаб бошқа овқат қилмасангиз, фарзандингиз ейишни истамай қолса, ҳафсалангиз пир бўлиши, болангиз эса овқатсиз қолиши мумкин.
Болага вақт беринг
Кўпинча болалар ўйин билан овора бўлганликлари учун овқатланишдан бош тортади. Шу сабаб овқат тайёр бўлишидан 15-20 дақиқа аввал қачон тайёр бўлишини айтиб, огоҳлантириб қўйинг. Овқатни вақтида еб олса, кейин давом эттириши мумкинлигини билдиринг.
Тартиб ўрнатинг
Болалар нафақат консерватор бўлади, балки аввалдан нима бўлишини билишни ёқтиради, чунки бу орқали улар ўзини хавфсиз ва ҳимоялангандек ҳис қилади. Агар хонадонингизда нонушта, тушлик ва кечки овқат бир вақтда қилинадиган бўлса, болани овқатлантириш осонроқ бўлади. Шунингдек, оила аъзоларининг бир вақтда биргаликда ўтириб тановул қилиш одати ҳам бола ривожланишида муҳим бўлган хавфсизлик ва барқарорлик ҳиссини туйишига сабаб бўлади.
Тушлик ёки кечки овқат вақти стрессни ҳис қилмаслиги керак
Овқатланиш вақтида асабийлашиш ва ўзини ёмон ҳис қилиш ликопчадаги таом минг чиройли ва мазали бўлса ҳам, қизиқиш ва иштаҳани бўғади. Нима бўлишидан қатъи назар, ҳеч ким овқат вақти тортишмаслиги, асабийлашмаслиги ва бир-бирининг жиғига тегмаслигига амал қилиниши керак бўлган қоида ўрнатинг. Ўзингизни ҳам назорат қилинг, чарчаган бўлсангиз ва кайфиятингиз йўқ бўлса ҳам, боладан аламингизни олманг.
Изоҳ (0)