Иқтисодий тадқиқотлар ва ислоҳотлар маркази раҳбарияти журналист ва блогерлар билан кўпроқ ишлаб, уларнинг илмий саводхонлигини оширишни режалаштирмоқда. Бу ҳақда 5 ноябрь куни бўлиб ўтган матбуот анжуманида сўз юритилди, дея хабар бермоқда «Дарё» мухбири.
«Тан олишимиз керак, бизга ўхшаган илмий-тадқиқот институтлари ва академик соҳа вакиллари блогерлар, журналистларнинг иқтисодий билимларини ошириш бўйича етарли иш қилинмаётганлигини ҳам кўрдик. Кеча марказимизга бир қанча блогерлар, радиоканаллардан чиқиб турли саволлар беришди. Афсуски, кўп одамлар интервьюни тўлиқ кўрмай, фикр билдирмоқда, қандай тушунмовчиликлар бўляпти. Блогерлар билан кўпроқ ишлаб, уларнинг илмий саводхонлигини ошириш бўйича ишлашни олдимизга мақсад ҳам қилиб қўйдик. Улар билан битта нотада бўлиш учун бирга ишлашимиз керак. Шуни алоҳида қайд этиш жоизки, бир томондан одамлар мавзуга бефарқ эмас экан. Бу йўлда яна қанча иш қилишимиз кераклиги бўйича режаларимизни тўғрилаб олдик», — деди Обид Ҳакимов.
Ҳакимов блогер ва журналистларни популизмга берилмасликка чақириб, улар билан яқин ҳамкорликда ишлашга тайёрлигини билдирди.
«Айтиш керакки, Ўзбекистон иқтисодий соҳа бўйича ҳам ўзининг аниқ сиёсатини амалга ошириб келяпти. Аммо охирги пайтларда баъзи журналистлар, блогерлар томонидан популизмга берилиш, ҳар хил асосланмаган чиқишлар қилинаётганини ҳам кўриб турибмиз.
Куни кеча Тошкентдаги Вестминстр халқаро университетида ўтказилган тадбирда таниқли рус иқтисодчиси Сергей Гуриевнинг популизм ҳақидаги илмий мақоласини муҳокама қилувчи сифатида қатнашдим. Мақолада популизм иқтисодий ривожланишга қанчалик салбий таъсир кўрсатилиши айтиляпти. Тадқиқотларга асосан, 95 фоиз ЯИМ ишлаб чиқариладиган 60 та энг катта мамлакатда популистик кайфият кўпайганида узоқ муддатда, кейинги 10-15 йил ичида ЯИМнинг 10 фоизлар атрофида фарқ қилиши, яъни паст бўлиши айтиляпти.
Бу нарса нимага олиб келади? Янада асосланмаган қарорларнинг қабул қилиниши ва бошқа нарсаларга олиб келади. Шу орқали давлатимиз раҳбари аниқ белгилаб берган, оғишмай кетаётган йўлимизда одамларни сал чалғитиши мумкин. Шунинг учун биз сизлар билан доим ҳамкорлик қилишга тайёрмиз. Берилаётган материалларингизни илмий асослар орқали тайёрлаш бўйича қандай ёрдам керак бўлса, биз ёрдам беришга ҳар доим тайёрмиз.
Кеча ҳам ижтимоий тармоқларда агрессив тоннинг мавжудлигини кўряпсиз. Бу нарса ҳеч қачон бизнинг ривожланишимиз, конструктив мулоқот қилишимизга фойда бермайди. Биз ҳар доим конструктив мулоқот тарафдори бўлиб қоламиз», — деди Иқтисодий тадқиқотлар ва ислоҳотлар маркази директори.
Изоҳ (0)