Германиянинг CureVаc NV биофармацевтик компанияси коронавирусга қарши вакцина синовларининг иккинчи босқичи муваффақиятли ўтгани ва йил охиригача якуний босқич тугашини эълон қилди.
«Биз асосий 2b/3 (2- ва 3-босқич) синовларни 2020 йил охиригача амалга оширишга тайёрмиз», – дейилган компания пресс-релизида.
Аввалроқ CureVаc’нинг 2b/3 глобал клиник синовларни 2020 йил тўртинчи чорагида 30 минг нафар кўнгилли иштирокида амалга оширишни режалаштиргани маълум қилинганди.
Синовларнинг биринчи босқичи Германия ва Бельгиядаги соғлом одамлар (кўнгиллилар) иштирокида ўтказилган. Айни вақтда CVnCoV вакцинаси Перу ва Панамада 2а синовларидан ўтмоқда. Тадқиқот биринчи босқичи 18 дан 60 ёшгача бўлган 250 нафар соғлом одамларни қамраб олган ва уларнинг натижалари катта умидлар бермоқда, деган Тюбинген тропик тиббиёт институти директори, профессор Петер Кремснер.
Компания ахборотида қайд этилишича, вакцинанинг реактогенлиги маълумотлар мониторинг ва хавфсизлик комиссияси томонидан доимий назорат қилинган. Вакцина синовларида барча дозаларда яхши қабул қилинган, жиддий ножўя таъсирлар кузатилмаган.
Эслатиб ўтамиз, Россиянинг «Вектор» вирусология ва биотехнология давлат илмий маркази мамлакатдаги коронавирусга қарши иккинчи вакцинани ишлаб чиқаришни бошлаган. «ЭпиВакКорона» Россиянинг коронавирусга қарши иккинчи вакцинаси бўлиб, ушбу вакцина учун сентябрь ойи охирларида патент олинган. Вакцина мушак остига жўнатиладиган суспензия шаклида ишлаб чиқарилади.
Аввалроқ Россияда патентланган ва рўйхатга олинган COVID-19’га қарши биринчи вакцина яратилган Гамалея илмий маркази директори Александр Гинцбург коронавирусга қарши вакцина қабул қилинганидан кейин пайдо бўладиган антитаналар кекса, спиртли ичимлик ичувчи, руҳий босимга тушган ва яллиғланишга қарши дори қабул қиладиган кишиларда яхши шаклланмаслигини маълум қилганди.
Шунингдек, Британиялик экспертлар коронавирусга қарши дастлабки вакциналарга ишончсизлик билдирганди. Билл Гейтс коронавирусга қарши дастлабки вакциналар самарадорлиги идеал бўлмаслиги мумкинлигини айтганди.
Изоҳ (0)