АҚШ Савдо ваколатхонаси (USTR) Ўзбекистонда ишчилар ҳуқуқларини таъминлаш бўйича Умумлаштирилган имтиёзлар тизими (GSP) мезонларига амал қилиниши бўйича текширувларни якунлади. Дастур доирасида мамлакатнинг савдо имтиёзлари ўзгаришсиз қолди, дейилади USTR ахборотида. Тингловлар 2008 йилдан — Халқаро ишчилар ҳуқуқлари форуми (ILRF) мамлакатнинг GSP’даги мақомини кўриб чиқиш учун мурожаат юборганидан буён давом этаётган эди, деб ёзади «Gazeta.uz».
АҚШнинг Умумлаштирилган имтиёзлар тизими (GSP — Genaralized System of Preferenses) 1974 йилда пайдо бўлган ва ривожланаётган мамлакатлар иқтисодиётини ривожлантириш учун бир қатор товарларга савдо имтиёзларини таклиф этади. Дастур 119 давлат ва бенефициар ҳудудлардан 3,5 минг хил товарларни АҚШга божсиз олиб кириш ҳуқуқини беради. Ушбу имтиёзлардан фойдаланиш учун бенефициар мамлакатлар 15 та танлов мезонларига жавоб бериши керак, улар орасида халқаро миқёсда тан олинган ишчилар ҳуқуқларини муҳофаза қилиш, интеллектуал мулк ҳуқуқларининг самарали амалга оширилиши ва ўз бозорларига тенг ва адолатли кира олиш имкониятини яратиш каби мезонлар ҳам бор. Ўзбекистонга GSP бенефициари мақоми 1994 йил август ойида берилган.
Таъкидланишича, АҚШ «Ўзбекистонда пахта йиғим-теримида мажбурий меҳнатга барҳам бериш йўлидаги камчиликларни тугатиш» учун Ўзбекистон билан алоқаларни давом эттиради.
Эслатиб ўтамиз, 2019 йилнинг ноябрь ойи бошида АҚШ Савдо ваколатхонаси (USTR) Преференсиялар бош тизимининг Ўзбекистонга нисбатан қўлланилишига оид масалани кўриб чиқишни тўхтатиш бўйича қарор қабул қилган эди.
Изоҳ (0)