27 октябрь кунига ўтар кечаси Тошкент шаҳар Мирзо Улуғбек тумани Ҳамид Олимжон кўчасида жойлашган кўп қаватли уйларнинг биридаги ижарага олинган хонадонда қимор ўйинларини ташкил этган шахс қўлга олинди. Бу ҳақда Тергов департаменти хабар берди.
Маълумотларга кўра, Ж.П. исмли 30 ёшли шахс ижарага олган хонадонида 21 ёшдан 44 ёшгача бўлган 13 нафар фуқаронинг қимор таваккалчиликка асосланган картадан «сувара» ўйинини ўйнашига шароит яратиб берган.
Қайд этилишича, Ж.П. ҳар бир ўйинда ғалаба қозонган шахслардан 5 минг сўмдан 10 минг сўмгача бўлган миқдордаги пул маблағларини олиб, моддий бойлик орттирган.
Терговга қадар текширув жараёнида 30 ёшли Ж.П.дан 780 минг сўм ва 200 АҚШ доллари миқдоридаги нақд пуллар, 6 дона очилмаган карта ҳамда 2 дона очилган карта ашёвий далил тариқасида ҳужжатлаштириб олинган.
Мазкур ҳолат юзасидан Мирзо Улуғбек тумани бўйича ИИО ФМБ ҳузуридаги Тергов бўлими томонидан Ж.П.га нисбатан Жиноят кодексининг 278-моддаси 1-қисми (қимор ва таваккалчиликка асосланган бошқа ўйинларни ташкил этиш ҳамда ўтказиш) билан жиноят иши қўзғатилган.
Шунингдек, қимор ўйинларида иштирок этган шахсларнинг ҳаракатларида Маъмурий жавобгарлик тўғрисидаги кодекснинг 191-моддасида кўрсатилган ҳуқуқбузарлик аломатлари бўлганлиги учун тегишли тартибда ҳужжатлар расмийлаштирилиб, Маъмурий ишлар бўйича Мирзо Улуғбек туман суди томонидан уларнинг ҳар бирига нисбатан 5 суткадан қамоқ жазоси берилган.
Дастлабки тергов жараёнида, Ж.П. жиноят иши бўйича Жиноят кодексининг 278-моддаси 1-қисми билан айбланувчи тариқасида ишда иштирок этишга жалб қилинган ҳамда унга нисбатан гаров эҳтиёт чораси қўлланилган.
Ҳозирда тергов ҳаракатлари олиб борилмоқда.
Аввалроқ Хоразм вилоятида хонадонда ташкил қилинган қиморхона фаолиятига чек қўйилгани, шунингдек, Қорақалпоғистонда қимор ўйнаётган 14 нафар шахс қўлга олингани тўғрисида хабар берилганди.
Изоҳ (0)