Ижтимоий тармоқларда Тошкент вилояти Ангрен шаҳридаги «Навбаҳор» МФЙга қарашли Дукент қишлоғида кечаси айиқ кўчада юргани акс этган видео тарқалди. «Ўзбекистон 24» телеканалининг «Факт 24» дастури айиқнинг аҳоли орасида юриши билан боғлиқ мазкур ҳолатни ўрганди.
Экология ва атроф-муҳитни муҳофаза қилиш давлат қўмитаси матбуот котиби Бунёд Абдуллаевнинг маълум қилишича, бу қўнғир айиқ бўлиб, у Халқаро қизил китоб ва Ўзбекистон қизил китобига киритилган, мазкур ҳайвон тажовузкор ҳисобланмайди.
Қўмита вакилининг сўзларига кўра, ҳар йили бир ёки иккитадан болалайдиган қўнғир айиқнинг 2020 йилда учтадан болалаган ҳолатлари кузатилган. Унинг айтишича, қўнғир айиқ ҳар йили уйқуга кетишдан олдин ўзи учун ортиқча ёғ ва озуқа ғамлаш мақсадида аҳоли яшаш жойларига тушиши мумкин.
Телеканал томонидан хабар берилишича, айиқ 2 октябрь куни отиб қўйилган.
Экология ва атроф-муҳитни муҳофаза қилиш давлат қўмитаси айиқ билан боғлиқ фотосуратларда акс этган кишиларнинг шахсига аниқлик киритиш ишлари олиб борилаётганини маълум қилган.
«2020 йил 1 ноябрь куни ижтимоий тармоқларда Тошкент вилоят Ангрен шаҳар ‘Навбаҳор’ МФЙ Дукент қўрғонида айланиб юрган айиқ тўғрисида тарқалган хабар юзасидан Экология ва атроф-муҳитни муҳофаза қилиш соҳасидаги назорат бўйича инспекцияси инспекторлари томонидан ўрганиш ишлари олиб борилмоқда.
Ижтимоий тармоқларда тарқалган фотосуратлардаги фуқаролар шахсига аниқлик киритиш мақсадида тегишли ҳужжатлар ҳуқуқни муҳофаза қилиш органларига тақдим этилди. Суриштирув натижалари бўйича маълумотлар қўшимча тарзда маълум қилинади», — дейилади қўмита хабарида.
Тошкент вилояти ИИББ матбуот котиби Бобур Тўлаганов эса «Ўзбекистон 24» телеканали «Факт 24» дастури орқали отиб қўйилгани айтилган қўнғир айиқ ҳақидаги хабар ҳақиқатдан йироқлигини, айиқ отилмаганини маълум қилди.
«Бугун 2 ноябрь куни интернет тармоқларида Ангрен шаҳри Дукент қўрғонида жойлашган аҳоли яшаш пунктида айиқ юрганлиги ҳақидаги видео хабар тарқатилган эди.
Ушбу ҳолат юзасидан шу вақтнинг ўзида фуқаролар хавфсизлигини таъминлаш мақсадида вилоят ИИББ 2-минтақавий ҳудуд ППХ ходимлари ва Ангрен шаҳар ИИБ томонидан ушбу айиқ ушланиб, хавфсиз жойга жойлаштирилган.
Ҳозирда айиқ соғ-омон ва ходимлар қўриқловида. Эрта тонгдан уни ёввойи табиатга қайтариш режалаштирилган», — дея маълум қилди Бобур Тўлаганов ўзининг Telegram’даги каналида.
Бобур Тўлаганов ўз хабарига айиқнинг айни пайтда олинган суратларини ҳам илова қилган.
Изоҳ (0)