Ijtimoiy tarmoqlarda Toshkent viloyati Angren shahridagi “Navbahor” MFYga qarashli Dukent qishlog‘ida kechasi ayiq ko‘chada yurgani aks etgan video tarqaldi. “O‘zbekiston 24” telekanalining “Fakt 24” dasturi ayiqning aholi orasida yurishi bilan bog‘liq mazkur holatni o‘rgandi.
Ekologiya va atrof-muhitni muhofaza qilish davlat qo‘mitasi matbuot kotibi Bunyod Abdullayevning ma’lum qilishicha, bu qo‘ng‘ir ayiq bo‘lib, u Xalqaro qizil kitob va O‘zbekiston qizil kitobiga kiritilgan, mazkur hayvon tajovuzkor hisoblanmaydi.
Qo‘mita vakilining so‘zlariga ko‘ra, har yili bir yoki ikkitadan bolalaydigan qo‘ng‘ir ayiqning 2020-yilda uchtadan bolalagan holatlari kuzatilgan. Uning aytishicha, qo‘ng‘ir ayiq har yili uyquga ketishdan oldin o‘zi uchun ortiqcha yog‘ va ozuqa g‘amlash maqsadida aholi yashash joylariga tushishi mumkin.
Telekanal tomonidan xabar berilishicha, ayiq 2-oktabr kuni otib qo‘yilgan.
Ekologiya va atrof-muhitni muhofaza qilish davlat qo‘mitasi ayiq bilan bog‘liq fotosuratlarda aks etgan kishilarning shaxsiga aniqlik kiritish ishlari olib borilayotganini ma’lum qilgan.
“2020-yil 1-noyabr kuni ijtimoiy tarmoqlarda Toshkent viloyat Angren shahar ‘Navbahor’ MFY Dukent qo‘rg‘onida aylanib yurgan ayiq to‘g‘risida tarqalgan xabar yuzasidan Ekologiya va atrof-muhitni muhofaza qilish sohasidagi nazorat bo‘yicha inspeksiyasi inspektorlari tomonidan o‘rganish ishlari olib borilmoqda.
Ijtimoiy tarmoqlarda tarqalgan fotosuratlardagi fuqarolar shaxsiga aniqlik kiritish maqsadida tegishli hujjatlar huquqni muhofaza qilish organlariga taqdim etildi. Surishtiruv natijalari bo‘yicha ma’lumotlar qo‘shimcha tarzda ma’lum qilinadi”, — deyiladi qo‘mita xabarida.
Toshkent viloyati IIBB matbuot kotibi Bobur To‘laganov esa “O‘zbekiston 24” telekanali “Fakt 24” dasturi orqali otib qo‘yilgani aytilgan qo‘ng‘ir ayiq haqidagi xabar haqiqatdan yiroqligini, ayiq otilmaganini ma’lum qildi.
“Bugun 2-noyabr kuni internet tarmoqlarida Angren shahri Dukent qo‘rg‘onida joylashgan aholi yashash punktida ayiq yurganligi haqidagi video xabar tarqatilgan edi.
Ushbu holat yuzasidan shu vaqtning o‘zida fuqarolar xavfsizligini ta’minlash maqsadida viloyat IIBB 2-mintaqaviy hudud PPX xodimlari va Angren shahar IIB tomonidan ushbu ayiq ushlanib, xavfsiz joyga joylashtirilgan.
Hozirda ayiq sog‘-omon va xodimlar qo‘riqlovida. Erta tongdan uni yovvoyi tabiatga qaytarish rejalashtirilgan”, — deya ma’lum qildi Bobur To‘laganov o‘zining Telegram’dagi kanalida.
Bobur To‘laganov o‘z xabariga ayiqning ayni paytda olingan suratlarini ham ilova qilgan.
Izoh (0)