Namanganlik fuqaroni chuv tushirgan buxorolik ayolning firibgarligi fosh etildi. Bu haqda “Daryo”ga viloyat IIB axborot xizmati ma’lum qildi.
Ta’kidlanishicha, 2020-yilning sentabr oyida Buxoro shahrida yashovchi 33 yoshli ayol M.K. internet tarmog‘idagi “Zolotoya korona” sayti orqali Rossiyada vaqtincha ishlab kelayotgan 21 yoshli namanganlik fuqaro J.A.dan 450 dollar pul olgan va evaziga unga Rossiyadan O‘zbekistonga qaytib kelishi uchun chipta olib berishini va’da qilgan.
Biroq oradan ikki oylar o‘tgach fuqaro J.A. aldanib qolganini tushunib yetgan va ish bo‘yicha Buxoro shahar Ichki ishlar organlari faoliyatini muvofiqlashtirish boshqarmasiga murojaat qilgan.
Mazkur holat yuzasidan Buxoro shahar Ichki ishlar organlari faoliyatini muvofiqlashtirish boshqarmasi 3-son Ichki ishlar bo‘limi huzuridagi tergov guruhi tomonidan tezkor surishtiruv ishlari olib borilib, M.K.ning firibgarligi fosh etilgan. Unga nisbatan Jinoyat kodeksining 168-moddasi 3-qismi (firibgarlik) “b” bandi bilan jinoyat ishi qo‘zg‘atilgan.
“Fuqarolarimizdan o‘zganing mulkini jinoiy yo‘l bilan egallash maqsadini ko‘zlab, turli ijtimoiy tarmoqlar orqali e’lon qilinayotgan yutuqli o‘yinlar, turli xildagi aksiyalar, elektron savdolar va shu kabilarga aldanib qolmasliklarini so‘rab qolamiz”, — deydi Shuhrat Jalolov.
Hozirgi kunda fuqaro M.K.ga nisbatan tergov harakatlari davom ettirilmoqda.
Izoh (0)