АҚШ президентлигига Демократлар партиясидан номзод Жо Байден Пенсильвания, Флорида, Аризона ва Висконсинда амалдаги давлат раҳбари Дональд Трампни ортда қолдирмоқда, деб ёзади «РБК». The New York Times газетаси ушбу штатларни сайлов натижалари учун энг катта аҳамиятга эга штатлардан тўрттаси деб атамоқда.
АҚШ штатларининг катта қисми анъанавий тарзда Демократлар ёки Республикачилар партияси учун овоз беради. Шу сабабли кампания учун, тахминан, ўнта штат ҳал қилувчи аҳамиятга эга, уларда номзодлар имкониятлари деярли тенг бўлади. The Cook Political Report ҳисоб-китобларига кўра, 2020 йилда бундай штатлар Техас, Флорида, Жоржия, Шимолий Каролина, Огайо ва Айова ҳисобланади. Яна бир нечта штат — Пенсильвания, Аризона, Невада, Висконсин, Миннесота, Мичиган ва Нью-Ҳемпширдаги вазият ҳам ноаниқ, аммо бу штатлар Демократлар партиясига мойиллик кўрсатмоқда.
NYT ва Siena College ўтказган сўров натижаларига кўра, Байден Флоридада 3 та пунктга, Пенсильвания ва Аризонада 6 пунктга, Висконсинда 11 пунктга етакчилик қилмоқда. Газета қайд этишича, сўров натижалари Байден 2016 йилда овоз бермаган сайловчилар орасида оммабопроқ бўлган. Улар Демократлардан номзодни Висконсинда 19 та пунктга, Флоридада 17 пунктга, Пенсильванияда 12 пунктга ва Аризонада 7 пунктга устунлик билан қўллаб-қувватламоқда.
Шунингдек, сўров номзодлар орасидаги гендер фарқни ҳам аниқлади. Масалан, Аризонада сўровнинг эркак иштирокчилари орасида Трамп Байдендан ўзиб кетган бўлса, Байден, аксинча аёллар орасида етакчилик қилган. Бундан ташқари, Байден олий маълумотли оқ танли сайловчилар орасида катта фарқ билан Трампни ортда қолдирган бўлса, Пенсильвания ва Висконсинда кексалар орасида Байден яна етакчилик қилмоқда.
АҚШ президенти сайлови 3 ноябрь куни бўлиб ўтади. Унинг ўзига хослиги шундан иборат бўладики, коронавирус пандемияси орқали америкаликларнинг рекорд даражадаги қисми почта орқали овоз беради.
АҚШ президенти сайловида ғолиб тўғридан-тўғри сайловчилар томонидан эмас, балки сайловчилар коллегияси томонидан аниқланади. Жами сайловчилар 538 киши, ғалаба учун 270 кишининг овози керак. Сайловчилар сони ҳар битта штатда аҳоли сонига мос равишда тақсимланади — энг кўп аҳоли яшайдиган Калифорния штати 55 сайловчига эга. Иккинчи энг йирик штат — Техасда 38 сайловчи, Нью-Йорк ва Флоридада — 29 тадан сайловчи бор. Икки поғонали тизимни ҳисобга олганда, номзод умуммиллий даражада камроқ овоз тўпласа ҳам муайян штатлардаги ғалабаси ҳисобига сайловда ғолиб бўлиши мумкин.
Изоҳ (0)