Грузияда ўтказилган парламент сайловларида «Грузия орзуси — демократик Грузия» ҳукмрон партияси ғолибликка эришди. Бу ҳақда Марказий сайлов комиссияси томонидан эълон қилинган дастлабки расмий натижаларда сўз боради, деб хабар қилади «Gazeta.uz».
МСК ҳисоб-китобларига кўра, ҳукмрон партия 48 фоиздан ортиқроқ овоз тўплаган. Партия раиси Бидзину Иванишвили дастлабки расмий маълумотларни кутиб ўтирмасдан, ўз тарафдорларини ғалаба билан табриклаган.
«Ягона миллий ҳаракат» мухолифат партияси эса 27 фоизга яқин овоз тўплаган. «Европача Грузия — озодлик учун ҳаракат» ва «Ватанпарварлар альянси» партиялари 3 фоиздан кўпроқ овоз тўплашга муваффақ бўлган. Тўққизта партия эса 1 фоизли кўрсаткичдан ўтган.
«Грузия орзуси» масъул котиби Ираклий Кобахидзенинг сўзларига кўра, парламентдаги ҳукмрон партия айни вақтда 76 та мандатга эга бўлмоқда. Бу унга якка ўзи ҳукуматни шакллантириш имконини беради.
Грузия мухолифати сайловларни сохталаштирилган деб ҳисобламоқда. Мухолифат партиялар етакчилари халқаро кузатувчилардан парламент сайловларини қонуний дея тан олмасликни сўраш нияти.
1 ноябрь куни Тбилиси марказидаги парламент биноси қаршисида мухолифатнинг норозилик намойиши бўлиб ўтган. Уларнинг етакчилари парламент норозиликлари ва 8 ноябрь куни кенг кўламли акция ўтказишни маълум қилиб, эркин шароитда янги сайловлар ўтказиш талабини қўйган.
Аввалроқ Михаил Саакашвили Грузиядаги парламент сайловида мухолифат ғалаба қозонса, мамлакат бош вазири бўлишга тайёрлигини билдирганди.
Михаил Саакашвили 2015—2016 йилларда Украинанинг Одесса вилояти маъмуриятини бошқарган. 2017 йилда ўша вақтдаги Украина президенти Пётр Порошенко билан низо туфайли Саакашвили мамлакат фуқаролигидан маҳрум қилинганди. 2019 йилда Владимир Зеленский Украина президентлиги учун сайловларда ғалаба қозонгач Саакашвилига мамлакат фуқаролиги қайтариб берилди.
Изоҳ (0)