1899 йилнинг 31 октябрида Россия флоти афсонаси бўлган «Варяг» зирҳли крейсери сувга туширилди. Техник хусусиятлари жиҳатидан рус армиясида кучли тўплар билан қуролланган, электрлаштирилган ҳамда радиостанция ва буғ қозонларининг сўнгги модификацияси билан жиҳозланган «Варяг»га тенг келадигани йўқ эди. «Дарё» унинг тарихи ҳақида ҳикоя қилади.
Илк тарихи
Кема қурилиши Филаделфиядаги William Cramp and Sons компаниясида амалга оширилди. Россия флотига қўшилгандан сўнг «Варяг» Порт-Артурга жойлаштирилди. Бироқ қурилиш пайтида юзага келган жиддий нуқсонлар бир неча йиллик хизматдан сўнг «Варяг»ни 14 узелдан юқори тезликка эриша олмайдиган ҳолатга олиб келди ва бу унинг қайта таъмирланишини тақозо қилди.
1903 йил кузида ўтказилган синовлар шуни кўрсатдики, «Варяг»нинг тезлиги қайта қурилишдан сўнг ўзи дастлабки даврда кўрсатган тезликка деярли тенглашган эди. 1904 йил январь ойининг бошларида Сеулдаги Россия элчихонаси ихтиёрида нейтрал Чемулпо корейс портида «Варяг» ва «Кореец» жангчи кемаси бор эди.
Жангда
1904 йил 8 февралда контр-адмирал Уриу қўмондонлигидаги япон эскадраси Чемулпони қамал қилди. 9 февраль куни «Варяг» капитани Всеволод Фёдорович Руднев Уриудан соат 12:00 га қадар Чемулпо портини тарк этиш тўғрисида ультиматум олди. Бунга жавобан у Порт-Артурда жангга ўтишга ва муваффақиятсизликка учраган тақдирда, кемаларни портлатишга қарор қилди. Тушга яқин «Варяг» ва «Кореец» Чемулподан чиқиб кета бошлади ва Фамилдо оролидан ташқарида турган япон эскадронига дуч келди.Жанг бир соат давом этди. Бу вақт ичида «Варяг» душман тарафга жами 1 105 та, «Кореец» эса 52 та снаряд улоқтирди. Курашлар тугаганидан сўнг, харобаларда аниқланган топилмалар жангда фойдаланилган қуроллар сони бундан ҳам кўп бўлганини кўрсатди. «Кореец» жанг мобайнида тутун эффектидан ҳам фойдаланди.
Шиддатли жанглардан сўнг 9 февраль куни соат 18:10 да «Варяг» сув остида қолди, «Кореец» портлатилди. Россиянинг «Сунгари» пароходи ҳам чўктирилди. Рус-япон урушидан сўнг Япония ҳукумати Сеулда «Варяг» қаҳрамонлари хотирасига бағишланган музей ташкил этди. Рудневни «Кёкудзицюсё» («Кўтарилаётган қуёш») ордени билан тақдирлади. Жангдан кейин Чемулпода 24 нафар ярадор рус денгизчилари даволанди, улардан иккитаси вафот этди. Яна 11 нафар ярадор хорижий кемалар томонидан даволаниш учун олиб кетилди.
1905 йил 22 августда «Варяг» Япония императорлик флотига қўшилди. 1907 йилнинг 7 июлида крейсер «Соя» деб номланган 2-даражали жанг қуроли сифатида қайта таъмирланди ва фойдаланишга топширилди. Ундан етти йилдан кўпроқ вақт давомида ўқув мақсадларида фойдаланилди. Рус денгизчиларининг меҳнатига ҳурмат бажо келтирган японлар император Муцихитонинг шахсий қарори билан крейсернинг «Варяг» номини сақлаб қолди. 1909 йил 14 мартидан 7 августгача у Гавайи ороллари ва Шимолий Америкага узоқ масофали сузиш, навигация машқларини бажариш ва офицерларни тайёрлаш бўйича машқларда хизмат қилди. «Варяг»нинг бу вазифадаги фаолияти 1915 йил 1 декабригача давом этди.
Кейинги тарихи
Биринчи жаҳон уруши даврида Россия империяси ва Япония иттифоқчиларга айланди. 1916 йилда «Соя» крейсери («Сагами» ва «Танго» жанговар кемалари билан биргаликда) Россия томонидан сотиб олинди. 1916 йил 5 апрелда крейсер Владивостокка кўчирилди, шундан сўнг у собиқ «Варяг» номи билан Шимолий муз океани флотилиясига киритилди.Совет ҳукумати Россия империясининг қарзларини тўлашдан бош тортгани сабабли 1917 йил февралда крейсер инглизлар томонидан мусодара қилинди. 1920 йилда у немис компанияларига сотилди. 1925 йилда «Варяг» кучли бўрон домига тушиб қолди ва Ирланд денгизи қирғоғи яқинида чўкиб кетди. Унинг металл парчалари маҳаллий аҳоли томонидан талаб кетилди, кейинчалик крейсер портлатиб юборилди.
1954 йилда Чемулпо шаҳрида қаҳрамонликнинг 50 йиллиги муносабати билан КПСС Марказий қўмитаси «Варяг» фахрийларига пенсия тайинлаш тўғрисида қарор қабул қилди. СССР денгиз кучлари бош қўмондони Н.Г. Кузнецовнинг шахсан ўзи ўн беш нафар фахрийни «Жасорат учун» медаллари билан тақдирлади. Кейинчалик «Варяг» ва «Кореец»да хизмат кўрсатган яна 139 нафар фахрий денгизчиларга орден ва медаллар топширилди.
* * *
2003 йилда крейсер иштирокидаги жанглар бўлиб ўтган вайроналар ҳудудида биринчи рус экспедицияси бўлиб ўтди. Унда Францияда яшовчи капитан Рудневнинг набираси ҳам қатнашди. 2009 йил 13 июлда Корея билан олти йил давом этган музокаралардан сўнг Россия «Варяг» ва у билан боғлиқ бўлган қолдиқларни тўққиз ойга ижарага олди.
«Варяг» денгизчиларининг хотираси Владивосток денгизи қабристонидаги ёдгорлик билан абадийлаштирилди. Бугун Владивостокда «Варяг» қаҳрамонлар кўчаси мавжуд. Новомосковск ва Тула вилояти Заокский тумани Савино қишлоғида крейсер командири Руднев шарафига ёдгорликлар ўрнатилди. 2004 йил 9 февралда Тула вилоятида Руднев музейи очилди. 2004 йил 10 февралда тарихий денгиз урушининг 100 йиллигини нишонлаш учун Жанубий Кореянинг Инчхон портида ёдгорлик очилди. Унинг муаллифи Россияда хизмат кўрсатган ҳайкалтарош Андрей Балашовдир.
2006 йил 30 июлда крейсер чўкиб кетган жойда Шотландиянинг Лендалфут аҳоли пункти яқинида ёдгорлик лавҳи ўрнатилди. 1958 ва 1972 йилларда СССРда крейсер тасвири туширилган почта маркалари чиқарилди. Ҳарбий қуролнинг жасорати бир қатор адабий асарлар сюжети, хусусан, И. Андреевнинг «Ўтиш» ҳикоясининг асосини ташкил этди. 2018 йил июнь ойида Владивостокда кипрлик бастакор Мариос Иоанноу Элиянинг «Варяг» денгиз симфонияси премьераси бўлиб ўтди.
«Варяг» хотирасини абадийлаштириш учун очилган ёдгорликлар бугун дунёнинг кўплаб ҳудудларида мавжуд. У билан боғлиқ тарзда яратилган бадиий асарлар ва маданий бойликлар эса кема хотирасининг асрлар оша бардавом бўлишини таъминлаши шубҳасиз.
Дилбар Исматуллаева тайёрлади.
Изоҳ (0)