АОКАда ташкил қилинган брифингда Коронавирусга қарши кураш штаби аъзоси Барно Одилова аҳолидан тушаётган саволларга жавоб қайтарди.
Мутахассис коронавирусга қарши вакцина синовларида кўнгилли сифатида кимлар қатнашиши мумкинлигига ойдинлик киритган.
«Ҳар бир мамлакатда янги дори-дармонлар ишлаб чиқарилганидан кейин у бир неча босқичларда синовлардан ўтказилади, жумладан, вакциналар ҳам. Синовда қатнашиш учун кўнгиллилар ўз хоҳишларига кўра танлаб олинади. Коронавирус касаллигига қарши вакцинани синовдан ўтказишда ушбу касалликка чалинмаган ва организмида иммуноглобулин G шаклланмаган кўнгиллилар қатнашиши мумкин», – деган Барно Одилова.
Шунингдек, ССВ штаби аъзоси докадан тикилган ниқоб COVID-19 коронавирус инфекциясининг юқиш хавфини камайтириши учун неча қават бўлиши кераклиги борасидаги саволга ҳам жавоб берган.
«Докадан тикилган ниқоб 6-8 қаватгача бўлиши керак ва уни ҳар 3 соатда алмаштириш, ишлатилганидан кейин ювиб-дазмоллаб қайта фойдаланиш мумкин», – дея жавоб берган у.
Эслатиб ўтамиз, Инновацион ривожланиш вазирлиги Хитой Фанлар академияси билан Anhui ZhifeiLongcom Biopharmaceutical томонидан ишлаб чиқарилган вакцинанинг учинчи босқич клиник синовларини Ўзбекистонда ўтказилишини маълум қилган. Унга кўра, синов 18 ва ундан катта ёшдаги кўнгиллиларда ўтказилади ва синов бошланишидан олдин Хитой вакиллари эмлаш шартларини тушунтириш учун бир нечта тренинглар ташкиллаштиради. Кейинчалик Хитойнинг коронавирусга қарши вакцинаси синовларида қатнашадиган ўзбекистонлик кўнгиллиларга пул тўланиши мумкинлиги ҳақида хабар берилган.
Изоҳ (0)