Туркия ғарбида юз берган 6,6 магнитудали зилзилада ҳалок бўлганлар ва жароҳат олганлар орасида Ўзбекистон фуқаролари йўқ. Бу ҳақда Ўзбекистон Ташқи ишлар вазирлиги Консуллик-ҳуқуқий департаменти хабар берди.
Ўзбекистоннинг Истанбул шаҳридаги бош консулхонаси маълумотига кўра, Тошкент вақти билан соат 19:30 ҳолатига Туркиянинг ғарбий қисмида 2020 йил 30 октябрда содир бўлган кучли зилзила натижасида ҳалок бўлган ва жароҳат олганлар орасида Ўзбекистон фуқаролари қайд этилмаган.
Вазирлик хабарига кўра, Ўзбекистоннинг Анқара шаҳридаги элчихонаси ва Истанбул шаҳридаги бош консулхонаси Измир вилоятининг тезкор штаби билан доимий алоқа ўрнатган.
«Жароҳат олган ҳамюртларимиз тўғрисида маълумот аниқланганда зарур ёрдам кўрсатиш учун Ўзбекистоннинг Истанбул шаҳридаги бош консулхонасига мурожаат қилшингизни сўраймиз (Телефон: +90 212-323-20-36/37)», — дейилади вазирлик хабарида.
Эслатиб ўтамиз, Туркия ғарбида 6,6 магнитудали зилзила юз берди, эпимарказ Измир вилоятининг Сеферлихисар шаҳри атрофида, зилзила ўчоғи эса 16,5 километр чуқурликда жойлашган. Сўнгги маълумотларга кўра, зилзила оқибатида камида олти киши ҳалок бўлган, 202 киши жароҳат олган.
Изоҳ (0)