2020 йилнинг III чорагида Ўзбекистон олтин сотиш бўйича етакчи ўринни эгаллади. Бу вақт оралиғида Марказий банк 35 тонна олтин сотган. Бу ҳақда Жаҳон олтин кенгаши (WGC) маълумотларида келтирилган.
Ушбу кўрсаткич бўйича иккинчи ўринни 22 тонна олтин сотган ҳолда Туркия эгаллаб турибди. Шунингдек, Россия 1,2 тонна кўрсаткичи билан фаол олтин сотувчи мамлакатлар қаторидан жой олган.
Forbes нашрининг ёзишича, III чоракда олтинга бўлган талаб 2009 йил III чорагидан бери энг паст даражага тушган ва коронавирус пандемияси давом этаётган бир пайтда 892,3 тоннага камайган.
Олтин савдосининг ортиши мамлакатларда пандемия сабабли кузатилаётган иқтисодий зарбани юмшатиш учун олтинга бўлган рекорд даражадаги нархлардан фойдаланиб қолиш мақсадлари билан боғлиқ. Олтин нархи август ойининг бошида унсияси учун рекорд даражага, яъни 2067 долларга кўтарилган.
Аввалроқ Ўзбекистон 2020 йилнинг июль ойида олтин сотиш бўйича дунёда етакчига айлангани тўғрисида хабар берилганди.
Шунингдек, аввалроқ Ўзбекистон август ойида 2,5 миллиард долларидан зиёд суммага олтин экспорт қилгани ҳақида хабар берган эдик. Шу йилнинг январь—сентябрь ойларида Ўзбекистон 5,8 миллиард долларлик олтин экспорт қилган.
Мавзуга доир: Марказий банк раиси Ўзбекистон «кўп олтин сотиб юборгани» ҳақидаги гапларга муносабат билдирди
Изоҳ (0)