Илҳом Алиев Қорабоғнинг бир қисмида муваққат маъмурият тузишни буюрди

Озарбайжон президенти Илҳом Алиев Тоғли Қорабоғ ҳудудининг Озарбайжон кучлари эгаллаган бир қисмида муваққат махсус маъмурият тузиш ҳақида буйруқ имзолади, деб ёзади «РБК».

Президент сайтида эълон қилинган ҳужжатга кўра, эгалланган ҳудудларда:

• ҳар битта туманда алоҳида бошқарувни олиб борадиган вақтинчалик комендатуралар тузилади;
• Озарбайжон ИИВга комендантларни тайинлаш ва комендатуралар фаолиятини ташкиллаштириш юклатилди;
• комендатуралар қошида тезкор штаб тузилади, унга Давлат хавфсизлик хизматлари, ФВВ, Иқтисодиёт, Қишлоқ хўжалиги, Экология ва табиий ресурслар, Молия вазирликлари ва бошқа идоралар киради;
• вақтинчалик комендатуралар муҳим объектларни қўриқлаш, топилган ҳарбий техника, қуроллар, ўқ-дорилар, заҳарли ва портловчи моддалар, шунингдек, ноҳарбий техникани тўплаш, инвентаризациядан ўтказиш ва қўриқлаш, шунингдек, жамоатчилик тартибини сақлаш билан шуғулланади;
• вақтинчалик комендантлар ўз навбатида ҳудудларни миналардан тозалаш, жосуслик ва терроризм олдини олиш, энергетик объектлар ҳолатини баҳолаш, алоқа тармоғи яратиш учун чора-тадбирлар қабул қилади;
• ушбу ҳудудларда чиқиш ва киришнинг алоҳида режими жорий қилинади.

Сентябрь охирида низо кучайганидан буён Озарбайжон Тоғли Қорабоғда баъзи ҳудудларни эгаллаб олгани ҳақида кўп марта баёнот берган, аммо уларнинг ҳаммаси ҳам Арманистон томонидан тасдиқланмаган эди. Хусусан, Боку хабарига кўра, у тан олинмаган республика чегараларидан жанубдаги ҳудудни (Эрон билан чегарадаги), шунингдек, Мадагиз қишлоғи жойлашган ҳудудни эгаллаган.

25 октябрь куни Озарбайжон президенти Илҳом Алиев 25 октябрь куни Зангилан, Жаброил ва Кубатли туманларининг бир қатор қишлоқлари, шунингдек, Кубатли шаҳри қўлга олинганини маълум қилган. Кейинроқ Арманистон Мудофаа вазирлиги шаҳар эгалланганини тан олган эди.

Эслатиб ўтамиз, Тоғли Қорабоғдаги ҳарбий ҳаракатлар тинчликка эришиш учун қилинган учта уринишга қарамасдан, 27 сентябрдан буён давом этмоқда.