Қашқадарё вилояти ҳокими Зоир Мирзаев интернетда шов-шув бўлган Чироқчидаги мактаб ҳолати ҳақида гапириб, вилоятдаги барча мактаб филиалларини ўрганиш кераклигини билдирди. Бу ҳақда Халқ депутатлари вилоят кенгашининг навбатдаги сессиясида маълум қилинди, дея хабар берди «Дарё» мухбири.
«Ёндашувни ўзгартиришимиз керак. Мен сессия қарори билан барча депутатлар бирикиб, вилоятдаги мактаб филиалларини ўрганиб чиқишни таклиф қиламан. Халқ таълимидан, ота-оналардан вакиллар олиб, кўрайлик, ўрганайлик ва ўша қишлоққа филиал керакми ёки йўқми деган саволга жавоб топайлик. Кераклиги маълум бўлса, демак, ўша филиал ҳаммага керак», — деди вилоят ҳокими Зоир Мирзаев.
Зоир Мирзаевнинг маълумот беришича, вилоятда 1176 та мактаб бўлиб, шу мактабларнинг 300 дан ортиқ филиали мавжуд. Филиалларнинг 274 тасида кадастр ҳужжати йўқ. Мавжуд мактабларнинг 40 фоиздан ортиғи таъмирталаб, қўшимча бино қуришга муҳтож.
Вилоят ҳокими халқ таълими масъулларига мавжуд муаммолардан жамоатчиликни хабардор қилиб, «Бизда мана бундай авария ҳолатидаги мактаб бор, мана бундай авария ҳолатидаги синфхона ҳамда спорт зал бор деб» айтиш кераклигини билдирди.
«Мен вилоят раҳбари сифатида яхши биламан. Вилоятимиздаги 234 та мактабда иситиш тизими йўқ. Шу сабаб мавжуд муаммоларни ҳал қилиш учун 17 миллиард сўм зарурлигини билиб, Халқ депутатлари вилоят кенгаши қарорига кўра 9,5 миллиард сўмни шу мактаблар учун бердик. Шу маблағ ҳисобидан бу йил 116 та мактабнинг ‘отопление’ янгиланади», — деди ҳоким.
Сессияда аниқлик киритилишича, вилоятдаги мавжуд мактабларнинг 320 тасидагина спорт зал мавжуд.
«Мактабларимизнинг 30 фоизида ҳам спорт зал йўқ экан-ку. Бугун бу нарса кўтарилган бўлса, эртага спорт зал муаммоси ҳам кўтарилади. Нечта мактабда компьютер хонаси йўқ, нечта мактабда инглиз тили фани ўқитувчиси етишмайди, бу муаммолар ҳам кўрсатилиши тайин. Шунинг учун аниқ-ҳисоб китоб қилиб, маълумот беринг. Биз шу муаммога ечим излайлик», — деди Зоир Мирзаев.
Вилоят раҳбари масъулларнинг Олий таълим муассасасини хорижий тиллар мутахассислиги бўйича тугатаётган қашқадарёлик битирувчилар ҳақида маълумоти бор-йўқлиги билан қизиқиб, «Нега ҳар йили институтдан етарли даражада мутахассислар етишиб чиқса-да, ҳалигача бизда ўқитувчи етишмаслиги бор?, — деди.
Эслатиб ўтамиз, аввалроқ вилоятнинг Чироқчи туманидаги 61-мактабнинг қўрқинчли синфхоналари ижтимоий тармоқларда кўплаб муҳокамаларга сабаб бўлганди. Воқеалар ортидан тушган ОАВ вакиллари мазкур синфхоналарда икки йил давомида ўқувчиларга таълим берилганини фош қилди. Воқеалар хабар топган вилоят ҳокими Зоир Мирзаев эса, синфхоналарга ўтин киритиб, жамоатчиликни алдаган мактаб директорини вазифасига нолойиқ деб атади.
Изоҳ (0)