Samarqandda “Afrosiyob” poyezdining temiryo‘l relsiga tosh bo‘lagi qo‘ygan 40 yoshli shaxs aniqlandi. Bu haqda IIV axborot xizmati xabar berdi.

Foto: IIV

Ma’lum qilinishicha, 12-oktabr kuni Samarqand viloyati Ichki ishlar boshqarmasi Transport xavfsizligini ta’minlash boshqarmasi tergov bo‘limi navbatchilik qismiga Transportda XTBB YPKB xodimi, leytenant U.M. telefon orqali 759-sonli Qarshi–Samarqand–Toshkent yo‘nalishidagi “Afrosiyob” tezyurar yo‘lovchi poyezdi Gumbaz–Maroqand temiryo‘l bekatlari oralig‘ida harakatlanayotgan vaqtida temiryo‘l relsiga tosh qo‘yilganligi haqida xabar qildi.

Surishtiruv davomida “Afrosiyob” tezyurar yo‘lovchi poyezdi Gumbaz–Maroqand temiryo‘l bekatlari oralig‘ining 3741 kilometr 7-piketida harakatlanishi vaqtida temiryo‘l izining o‘ng tomoniga tosh bo‘lagi qo‘ygan shaxs 1980-yilda tug‘ilgan, Samarqand viloyati, Pastdarg‘om tumani, Jovulqosim qishlog‘ida yashovchi fuqaro N.Sh. ekanligi aniqlangan.

Hozirda surishtiruv ishlari davom etmoqda.

Avvalroq Samarqandda yuk poyezdi quloqchin taqqan yigitni urib ketmaslik uchun favqulodda to‘xtashni amalga oshirgani xabar qilingandi.