Фарғонада ҳайдовчилик гувоҳномаси бўлмаган 17 ёшли ўқувчи ЙТҲ содир этиб, пиёданинг ўлимига сабаб бўлди (видео)

Фарғона вилояти Қува туманида ҳайдовчилик гувоҳномаси бўлмаган 17 ёшли мактаб ўқувчиси Nexia машинасида йўл-транспорт ҳодисаси содир этиб, бир кишининг ўлимига сабаб бўлди. Бу ҳақда Ички ишлар вазирлиги Йўл ҳаракати хавфсизлиги бош бошқармаси хабар берди.

Маълум қилинишича, 2020 йилнинг 21 октябрь куни соат 12:00 да Қува тумани ҳудудидан ўтган 4К-835 автомобиль йўлининг 14-километрида йўл-транспорт ҳодисаси содир бўлган.

Аниқланишича, 2003 йилда туғилган мактаб ўқувчиси Nexia автомобилини ота-онасининг рухсатисиз уйидан ҳайдаб чиқиб кетган. У машинани катта тезликда бошқариб, хавфли бурилиш жойида бошқарувни эплай олмаган ва йўл четидаги пиёдани уриб юборган, автомобиль эса йўл четига ағдарилган. Пиёда олинган тан жароҳатлари оқибатида вафот этган.

Аввалроқ «Менинг фикрим» жамоавий мурожаатлар порталида Ўзбекистонда 16 ёшдан автомобиль бошқаришга рухсат бериш ҳақида петиция эълон қилинганди.

ИИВ ЙҲХББ мазкур петицияга муносабат билдириб, 16 ёшли болаларда ҳали «мен» деган фикр сўнмаган бўлиши, мақтанишни, олифталикни яхши кўриши, бунинг оқибатида эса йўл ҳаракати қоидаларига амал қилмаслик, менсимаслик ёки қасддан тенгдошларига, дўстларига автомобилини мақтаниш учун йўл ҳаракати қоидаларига қарши ҳаракат қилиши мумкинлиги ҳақида айтганди.