Видео: Нюрбургрингда синовдан ўтказилаётган энг тезкор Hyundai Elantra

Жанубий Кореянинг Hyundai Motor компанияси энг тезкор модификацияга эга N линейкасига кирувчи янги авлод Elantra’ни тақдим этишга тайёргарлик кўрмоқда. Марка ўзининг ушбу седанини Нюрбургринг трассасида синовдан ўтказишга қарор қилди, деб хабар беради Motor.

YouTube’даги CarSpyMedia каналида комфуляжланган Elantra N прототипининг Германиядаги трасса ҳаракатланаётгани тасвирланган 3 дақиқали видео пайдо бўлди. Маскировка остидан Hyundai июль ойида тақдим этган Elantra N Line «кичик» версиясидан ажралиб турувчи жиҳатлар кўзга ташланган.

N суббренди модели паст профилли резина кийгизилган ғилдирак дискаларига, орқа бампернинг ён томонларига жойлаштирилган газ чиқариш тизими ва юкхона томидаги улкан спойлерга эга бўлган.

Маълумотларга кўра, Elantrа N’нинг капоти остидан 275 от кучига эга икки литрли турбомотор ўрин олган бўлиб, у олти поғонали механик узатмалар қутиси ёки янги саккиз диапазонли «робот» ёрдамида бошқарилади. Бу каби моторга эса и30 N соатига 100 километр тезликка 6,2 сонияда эришади, максимал тезлиги эса 250 км/соат.

Hyundai Elantra N шу йилнинг охирига қадар тақдим этилиши мумкин. Ҳозирги кунда Жанубий Кореянинг N линейкасидан учта модель ўрин олган: Veloster N, i30 N ва и20 N.

Аввалроқ интернетда Hyundai Ioniq 5 серияли электрокроссовери прототипининг янги суратлари, Hyundai Tucson’нинг эса финал синовлари тасвирланган видео пайдо бўлганди.