Касаба уюшмалари федерацияси ташаббуси билан 20 октябрь куни Сирдарё вилоятининг бир қанча ҳудудига пресс-тур уюштирилди. Тадбир иштирокчилари, яъни нуронийлар, ОАВ ва бошқа соҳа вакиллари Сардоба, Оқолтин, Мирзаобод ҳамда Сирдарё туманларида бўлишди. Улар Сардоба талафотидан сўнг бунёд этилган замонавий кўп қаватли уйлар, ишлаб чиқариш цехлари, қайта таъмирланган хонадонлар ва бир қанча объектлар билан яқиндан танишишди. «Дарё» мухбири Миролим Исажонов Оқолтин туманидаги «Янги Тошкент» маҳалласидан репортаж тайёрлади.
Тошкент шаҳар ҳокимлиги буюртмасига асосан, «Янги Тошкент» маҳалласи қисқа вақт ичида янги қиёфага кирди. 130 та бетон-панелли уй-жойда таъмирлаш-тиклаш ишлари бажарилиб, 200 дан ортиқ оиланинг яшаш шароити яхшиланди. Электр энергияси, табиий газ, ичимлик сув таъминоти тикланди. МФЙдаги мавжуд 8 та кўчанинг ҳар бирига пойтахт туманларининг номи берилди.
Маҳалла раиси Абдурауф Шодмоновнинг таъкидлашича, аввал бу ҳудудда МФЙ биноси йўқ эди. Маҳалла ходимлари мактабда ижарада фаолият юритган. Бугунги кунда эса бир қаватли бино қурилиб, фойдаланишга топширилди. Бинода 5 та муҳим ташаббус доирасида ёшлар учун мусиқа, компьютер ва бошқа хоналар ажратилган.
Сентябрь ойида фаолиятини бошлаган замонавий кутубхона ҳам табиий офатдан сўнг бунёд этилди. Шу пайтга қадар маҳаллада кутубхона бўлмаган. Ушбу маърифат масканида мингга яқин ўзбек ва жаҳон адабиёти дурдоналари бор. 4 та компьютер ёрдамида китобхонлар Алишер Навоий номидаги Миллий кутубхонанинг электрон китобларидан тўғридан-тўғри фойдаланиш имкониятига эга. Китобсеварлар талабидан келиб чиқиб, бадиий асарлар уйда мутолаа қилиш учун ҳам берилади.
«Янги Тошкент» аҳолисини иш билан таъминлаш мақсадида Тошкент шаҳар ҳокимлиги ташаббусига кўра, 100 та янги иш ўрнига эга «Нафис либослар» тикувчилик цехи ҳам ташкил этилди. Лойиҳа тадбиркор Баҳром Тоштемировнинг 500 миллион сўм шахсий маблағи ва банкнинг 2 миллиард сўм кредити асосида амалга оширилди. Корхона келгуси йили тўлиқ қувватга чиққач, йилига 500 минг дона текстиль маҳсулотлари ишлаб чиқарилади. Уларнинг 60 фоизини Россия, Тожикистон, Қозоғистон давлатларига экспорт қилиш кўзда тутилган.
2004 йилда қурилган оилавий поликлиника ҳам қайта реконструкция қилинди. Поликлиникага янги тиббиёт ускуналари, ЭКГ, УЗИ олиб келинди. Болалар невропатологи, УЗИ шифокори иш бошлади, дорихона ташкил этилди. Қисқаси, аҳолига тиббий хизмат кўрсатиш сифати яхшиланди.
Шунингдек, ҳудуддаги 130 ўринли 5-мактабгача таълим муассасаси ҳамда 150 ўринли умумтаълим мактаби биноси ҳам қайта таъмирланди. Савдо ва маиший хизмат шохобчалари, болалар майдончаси, спорт мажмуаси барпо этилиб, ички йўллар қурилди.
Изоҳ (0)