Таниқли журналист, ижтимоий тармоқларда «Усмон Ҳақназар» тахаллуси остида ижод қилган Бобомурод Абдуллаевга хорижга чиқиш паспорти топширилди. Бу ҳақда «Kun.uz» хабар қилган.
Қайд этилишича, 23 октябрь куни Ўзбекистон Республикаси Ички ишлар вазирлигининг миграция ва фуқароликни расмийлаштириш бош бошқармаси расмийлари томонидан журналист Бобомурод Абдуллаевга хорижга чиқиш паспорти топширилган. Шунингдек, журналистга нисбатан барча тергов ва суриштирувлар тугатилган, суд иши ҳам якунланган, унга Ўзбекистон ичида ва хорижга чиқиш билан боғлиқ ҳар қандай чекловлар бекор қилинган.
Ўз навбатида, Бобомурод Абдуллаев бу янгилик ўзи учун кутилмаган ҳолат бўлгани ва бундан хурсандлигини таъкидлаган.
Аввал Президент Шавкат Мирзиёев журналист Бобомурод Абдуллаевга Тошкент шаҳридаги турар жой мажмуаларининг биридан барча жиҳозлари ва маиший техникалари билан уч хонали квартира ҳадя қилгани ҳақида хабар берилганди.
Журналист Бобомурод Абдуллаев Ўзбекистон сўровига мувофиқ, 8 сентябрь куни Қирғизистонда ҳибсга олинган. Кейинроқ журналистнинг онаси Президент Шавкат Мирзиёевга мурожаат қилгани инобатга олиниб, у 22 август куни муносиб хулқ-атворда бўлиш тўғрисидаги тилхат билан озод қилингани маълум бўлган.
Бобомурод Абдуллаев 2017 йилда ҳам Ўзбекистонда конституциявий тузумини ағдариб ташлаш мақсадида фитна уюштириш жиноятида гумон қилиниб, қамоққа олинган, 2018 йил май ойида суд залидан озод этилган.
Изоҳ (0)