Наманган вилоятида фуқаронинг сир сақланиши керак бўлган маълумотини интернетда тарқатиб юбориш билан қўрқитиб, ундан 100 АҚШ доллари талаб қилган шахс ушланди, дея хабар бермоқда Тергов департаменти.
Маълум қилинишича, 2020 йилнинг 28 сентябрь кунидан 29 сентябрь кунига ўтар кечаси, Наманган вилояти Учқўрғон шаҳрида истиқомат қилувчи 20 ёшли А.С. Учқўрғон шаҳри «Кўприкбоши» МФЙда истиқомат қилувчи 21 ёшли Ш.А.га қўнғироқ қилиб, унга 2017 йилда Тоҳир исмли шахс билан жанжаллашган ҳолати тасвирга туширилган видеони Telegram ижтимоий тармоғидаги гуруҳларда тарқатиб юборишини айтган.
Шундан сўнг А.С. тасвирни фуқаро Ш.А.нинг телефонига юбориб, унинг учун сир сақланиши лозим бўлган маълумотларни ошкор қилиш билан қўрқитиб, ушбу видеони тарқатиб юбормаслик эвазига Ш.А.дан 100 АҚШ доллари миқдоридаги пулларни талаб қилган.
А.С. талаб қилган пулларини олаётган вақтида ИИБ ходимлари томонидан ушланган.
Мазкур ҳолат юзасидан Учқўрғон туман ИИБ ҳузуридаги Тергов бўлинмаси томонидан Ш.А.га нисбатан Жиноят кодексининг 165-моддаси 1-қисми (товламачилик) билан жиноят иши қўзғатилган.
Ҳозирда тергов ҳаракатлари давом этмоқда.
Аввалроқ Наманганда танишининг шахсий видеосини тарқатмаслик эвазига 100 доллар талаб қилган шахс, Сергелида 31 ёшли эркакни шахсий видеоларини тарқатиш билан «шантаж» қилмоқчи бўлган аёл, Бухорода аёл танишининг шахсий фотосуратларини тарқатиш билан қўрқитиб, ундан 1000 доллар талаб қилган шахс ва Самарқандда 43 ёшли танишининг суратларини интернетга тарқатиш билан қўрқитиб, 2200 доллар талаб қилган аёл қўлга олингани ҳақида хабар берилганди.
Изоҳ (0)