Чехияда сўнгги бир сутка ичида коронавирус билан касалланиш бўйича қарийб 15 мингта янги ҳолат қайд этилди. Польшада бу кўрсаткич 12 мингтадан ошган, Германияда эса 11 мингдан ортиқ янги ҳолат қайд этилган. Бу кўрсаткичлар мазкур мамлакатлардаги янги антирекордлар ҳисобланади, деб ёзмоқда «Korrespondent.net».
Чехия аҳоли жон бошига тўғри келаётган касалланиш ҳолатлари сони бўйича Европада биринчи ўринга чиқди.
Сўнгги бир сутка ичида Чехияда 14 968 кишида коронавирус аниқланган. Бу 20 октябрда қайд этилган аввалги рекорддан уч мингтага кўп ҳисобланади. Бир сутка ичида коронавирусга чалинган 120 нафар бемор вафот этган. Коронавирус қурбонлари сони биринчи марта 100 кишидан ошган. Мамлакат аҳолиси 10,7 миллион кишини ташкил қилади.
Польшада сўнгги бир сутка ичида 12 107 кишида коронавирус тасдиқланган, бир кун аввал эса 10 040 кишида касаллик аниқланган. Коронавирусга чалинган 168 нафар бемор сўнгги бир сутка ичида вафот этган, бу мамлакатда пандемия бошидан буён қайд этилган энг юқори кўрсаткич ҳисобланади. Мамлакат аҳолисининг сони 37,9 миллион кишига тенг.
Германияда эса сўнгги бир суткада коронавирус билан касалланиш бўйича 11 287 та янги ҳолат аниқланган. Бу 17 октябрда қайд этилган 7830 та ҳолатдан уч мингтага кўп ҳисобланади. Мамлакат аҳолиси эса 83 миллион кишини ташкил қилади.
Изоҳ (0)