Қирғизистон президенти вазифасини бажарувчи Садир Жапаров мамлакатда иқтисодий амнистия эълон қилди. Бу ҳақда «24.kg» хабар берди.

Фото: «РИА Новости»

«Менга берилган ваколатлардан фойдаланиб, расман иқтисодий амнистия эълон қиламан», — дея маълум қилган президент вазифасини бажарувчи бош вазир Садир Жапаров.

Унинг сўзларига кўра, ҳозирги пайтда давлат ҳокимиятининг барча йўналишларига катта вазифалар юкланмоқда. Садир Жапаровнинг ўзи давлат раҳбари ва бош вазир вазифаларини бажармоқда.

Хабар берилишича, Садир Жапаров давлат бюджетини тўлдириш, шу жумладан, қўшимча ресурсларни ундириш, хорижга ноқонуний олиб чиқиб кетилган капитални қайтариш, бизнеснинг хуфиёна ресурсларини қонуний майдонга чиқариш учун иқтисодий амнистия эълон қилиш ҳақида қарор қабул қилди.

Бундан ташқари, Жапаров амнистия ҳисобидан барча тадбиркорлик субъектлари учун тенг шароитлар яратиш, ижобий макроиқтисодий кўрсаткичларга эришиш, қисқа муддатда мамлакат иқтисодиётини қўллаб-қувватлаш учун зарур маблағларни ундириш ва ташқи қарз тўловларини таъминлаш истагида.

Садир Жапаровнинг сўзларига кўра, сўнгги 30 йил ичида энергетика, божхона ва солиқ хизмати, дори таъминоти, лицензия бериш, ер остидан фойдаланиш ва бошқа шу каби соҳаларда тизимли коррупцион схемалар ривожланган.

«Шу муносабат билан оддий халқ ҳисобидан яшаган, уни ўмарган коррупционерларга, жиноий схема ташкил қилганларга, турли компанияларда улушга эга бўлган собиқ мансабдорларга, рейдерлик йўли билан йирик компанияларнинг акцияларини ноқонуний эгаллаб олган мансабдорларга, солиқ тўлашдан бўйин товлаётган тадбиркорларга, амалдаги қонунчиликни бузишга алоқадор бўлган ёки кўрсатиб ўтилган қилмишларни амалга оширишга ёрдам бераётган алоҳида мансабдорларга, вазирлик ва идоралар раҳбарларига, божхоначилар ва молиячиларга 30 кун муддат бераман. Истайманки, барча ўз ихтиёри билан мавжуд ҳолатлар ҳақида реал маълумотларни ошкор қилсин ва тақдим эцин», — дея маълум қилган Жапаров.

У давлатдан ноқонуний олинган ҳар бир тийинни ихтиёрий равишда қайтаришни, шунингдек, яширин мулк ва капитал ҳақидаги маълумотларни ошкор қилиш ва тақдим этишни талаб қилган.

Давлат раҳбарининг маълум қилишича, қисқа муддатда иқтисодий амнистия ва пул маблағларини, кўчар ва кўчмас мулкни легаллаштириш учун ҳуқуқий база тайёрланади. Унинг айтишича, агар бу имкониятга эътиборсизлик қилинса ва ундан фойдаланилмаса, қонун доирасида энг қатъий чоралар кўрилади.

Аввалроқ Қирғизистонда Давлат божхона қўмитаси раисининг собиқ ўринбосари 700 миллион долларни мамлакатдан олиб чиқиб кетишда гумонланиб қўлга олинганди.