Афғонистонга ташрифи доирасида Ўзбекистон бош вазири ўринбосари – инвестициялар ва ташқи савдо вазири Сардор Умурзоқов раҳбарлигидаги Ўзбекистон ҳукумати делегацияси 2020 йилнинг 20 октябрь куни Кобул шаҳрида бўлиб ўтган Ўзбек тили кунини нишонлашда қатнашди. Афғонистон томонидан тадбирда Афғонистон президенти Ашраф Ғани ҳамда мамлакатнинг олий раҳбарияти иштирок этди. Бу ҳақда Инвестициялар ва ташқи савдо вазирлиги хабар қилмоқда.
Маълум қилинишича, тадбир давомида жаҳон цивилизацияси ривожига улкан ҳисса қўшган икки мамлакат халқларининг умумий аждодларининг маданий меросини асраб-авайлашга катта эътибор қаратгани учун Ўзбекистон ҳукумати номидан дўст бўлган Афғонистон ҳукумати ва халқига чуқур миннатдорчилик билдирилди.
Тадбирда Ўзбекистон Президентининг табриги ўқиб эшиттирилди, унда ўзбек ва афғон халқларининг тарихий тараққиёти ягона илмий ва маданий макон ва замонда рўй берганлиги маданият ва анъаналарнинг яқинлигини сақлаб қолиш, шунингдек, икки мамлакат ўртасида мустаҳкам дўстона муносабатларнинг шаклланиши учун шарт-шароитлар вужудга келишига имкон бергани алоҳида таъкидланди.
Шу билан бирга, Ўзбекистон–Афғонистон муносабатлари ривожида муҳим қадам бўлган ушбу тадбир келгусидаги маданий, илмий ва гуманитар ҳамкорликни фаоллаштириш учун кучли рағбатлантирувчи омил бўлишига қаратилганлигини таъкидладилар.
Тадбирда Афғонистон президенти Ашраф Ғани ва Афғонистон жамоатчилиги аъзолари ҳам сўзга чиқди.
Қайд этилишича, Афғонистонда 21 октябрь – расмий жиҳатдан байрам куни – Ўзбек тили куни деб эълон қилинган. Афғонистон Конституциясига мамлакатнинг расмий тилларидан бири сифатида киритилган ўзбек тили Афғонистоннинг 10 вилоятида кенг тарқалган ва йилдан йилга оммалашиб бормоқда. Афғонистонда ўзбек тилида бир нечта теле ва ўнлаб радиоканаллар эфирга узатилади.
Афғонистонга ташрифи давомида Сардор Умурзоқов Афғонистон президенти Ашраф Ғани билан учрашув ўтказди. Унда сиёсий-дипломатик, савдо-иқтисодий, инвестициявий, саноат, минтақавий ва маданий-гуманитар соҳаларида ҳамкорлик қилиш масалаларининг кенг доираси муҳокама қилинди.
Шунингдек, Сардор Умурзоқов Афғонистон ташқи ишлар вазири Муҳаммад Ханиф Атмар билан ҳам учрашув ўтказиб, транспорт-логистика, энергетика, таълим ва бошқа соҳаларда қўшма лойиҳа ва ташаббусларни амалга ошириш белгиланди.
Аввалроқ Шавкат Мирзиёев ўзбек тилини ривожлантириш бўйича 2030 йилгача мўлжалланган чора-тадбирлар тўғрисидаги фармонни имзолагани хабар қилинганди.
Изоҳ (0)