Наманган давлат университети докторанти, 1987 йил Чуст туманида туғилган шахс абитуриентларни Қирғизистон ёки Украина ОТМларига ўқишга киритиш ва кейинчалик уларнинг ўқишини НамДУга кўчиришни ваъда қилиб, пул талаб қилгани аниқланди. Бу ҳақда «Дарё»нинг ҳуқуқ-тартибот органларидаги манбалари хабар қилди.
Дастлаб докторантнинг фуқарони 2000 АҚШ доллари эвазига Қирғизистон ОТМларининг бирига ўқишга киритиб қўйишини ҳамда 2021/2022-ўқув йилида Наманган давлат университетига ўқишини кўчиртириб беришини айтиб, турмуш ўртоғи воситачилигида сўралган пулни олган вақтида ДХХ Наманган вилояти бошқармаси ҳамда Бош прокуратура ҳузуридаги департаментнинг ҳудудий бошқармаси ходимлари томонидан қўлга олинган.
Унга нисбатан жиноят иши қўзғатилиб, тергов ҳаракатлари давом этаётган бир вақтда фуқаро ўзининг жиноий қилмишларини давом эттирган. Яъни бошқа бир фуқарога Украина давлатининг Харьков Миллий университетидан ўқишини НамДУга кўчиртириб беришини ваъда қилиб, бунинг учун 800 АҚШ доллари ва 2 миллион сўм олган вақтида қўлга тушган.
Суриштирув жараёнида унинг фуқародан олдин ҳам 2000 АҚШ доллари миқдорида пул олгани маълум бўлган. Ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
2020 йил июнь ойида Наманганда лицей ўқитувчиси университетга ўқишга киритиб қўйишни ваъда қилиб, 2,5 минг АҚШ доллари ва 5 миллион сўм миқдорида пул талаб қилган ва уларни олаётган вақтида қўлга тушгани хабар қилинганди. Шунингдек, аввал Термизда 10 миллион сўмга сохта диплом расмийлаштириб бермоқчи бўлган коллеж директори ўринбосари ДХХ томонидан қўлга тушгани, Сирдарёда фуқарони қалбаки маълумотлар ёрдамида ўқишга киритиб қўймоқчи бўлган шахслар ушлангани ва 5 минг доллар эвазига консерваторияга ўқишга киритиб қўйишни ваъда қилган лицей ўқитувчиси қўлга олингани, Тошкентда ишга киритиб қўйиш учун фуқаролардан қарийб 19 миллион сўм ундираётган «майор» ҳибсга олингани ҳақида хабарлар берилган.
Изоҳ (0)