Ўзбекистон Президентининг 20 октябрдаги фармони билан Борий Алихонов ҳамда Наримон Умаров Олий Мажлиси Сенати аъзолари этиб тайинланди. Бу ҳақда Марказий сайлов комиссияси матбуот хизмати хабар берди.
Маълум қилинишича, 20 октябрь куни Марказий сайлов комиссиясининг навбатдаги мажлисида Олий Мажлисининг Қонунчилик палатаси депутатлари Борий Алихонов ва Наримон Умаровнинг берган ёзма аризасига асосан уларнинг депутатлик ваколати муддатидан илгари тугатилган.
Шунингдек, Ўзбекистон Президентининг «Ўзбекистон Республикаси Олий Мажлиси Сенати аъзоларини тайинлаш тўғрисида»ги 2020 йил 20 октябрдаги фармонига асосан ҳамда Сайлов кодексининг 14, 16 ва 75-моддаларига мувофиқ Марказий сайлов комиссияси Борий Алихонов ва Наримон Умаровни Олий Мажлиси Сенати аъзолари этиб рўйхатга олган.
Наримон Умаров Сенатнинг Суд-ҳуқуқ масалалари ва коррупцияга қарши курашиш қўмитаси раиси этиб сайланган. Борий Алихонов эса Сенатнинг янги ташкил этилган Оролбўйи минтақасини ривожлантириш масалалари қўмитаси раиси этиб сайланган
Маълумот учун, Ўзбекистон Конституциясининг 77-моддасида Сенатнинг 16 нафар аъзоси фан, санъат, адабиёт, ишлаб чиқариш соҳасида ҳамда давлат ва жамият фаолиятининг бошқа тармоқларида катта амалий тажрибага эга бўлган ҳамда алоҳида хизмат кўрсатган энг обрўли фуқаролар орасидан Президент томонидан тайинланиши белгиланган.
Эслатиб ўтамиз, шу йилнинг январь ойида Президенти Шавкат Мирзиёев томонидан имзоланган Олий Мажлис Сенати аъзоларини тайинлаш тўғрисидаги фармон билан 13 нафар сенатор тайинланган.
Мавзуга доир: Ўзбекистоннинг энг кекса сенатори вафот этди
Изоҳ (0)