Тошкент шаҳрининг Миробод туманида коронавирусни даволашда ишлатилаётган «Ремдесивир» дорисини 1 миллион сўмдан сотаётган 4 нафар эркак тезкор тадбир давомида қўлга олинган. Бу ҳақда ИИВ Транспортда хавфсизликни таъминлаш бош бошқармаси ахборот хизматига таяниб, «Kun.uz» маълум қилди.
Қайд этилишича, 17 октябрь куни шахси очиқланмаган фуқаро Транспортда хавфсизликни таъминлаш бош бошқармасига ариза билан мурожаат қилиб, Х. исмли шахс COVID-19 вирусига қарши қўлланилаётган «Ремдесивир» дорисини 1 миллион 350 минг сўмдан сотаётганини билдирган ва мазкур ҳолат юзасидан қонуний чора кўришни сўраган.
Транспортда хавфсизликни таъминлаш бош бошқармаси Жиноят қидирув бўлими томонидан ўтказилган тезкор тадбир давомида 17 октябрь куни куни соат 19:30 ларда Тошкент шаҳрида яшовчи 34, 33 ва 24 ёшдаги 4 нафар эркак шартли сотиб олувчи бўлиб иштирок этаётган фуқарога 60 дона «Remdesivir for Injection 100 mg» (ВDREM-100) номли дорини 60 миллион сўмга сотаётган вақтда ушланган.
Дорилар ҳамда 60 миллион сўм пул ашёвий далил сифатида олиб қўйилган. Ҳозир мазкур ҳолат юзасидан терговга қадар текширув ҳаракатлари олиб борилмоқда.
«Дориларнинг ноқонуний сотилиши уларнинг нархини кескин кўтарилишига сабаб бўляпти. ‘Ремдесивир’ дорисининг ҳақиқий нархи 500 минг атрофида, ушбу дори фақат дорихоналарда сотилиши керак. Бироқ, афсуски, бугунги кунда ушбу дорига талаб юқори бўлгани боис айрим шахслар вазиятдан фойдаланиб, уни қимматроққа сотишга уринмоқда, бу эса амалдаги қонунларга зид», – дейди Транспортда хавфсизликни таъминлаш бош бошқармаси катта инспектори лейтенант Покиза Хўжаева.
Эслатиб ўтамиз, «Ремдесивир» Европа Иттифоқида рухсат олиш учун тавсия қилинган коронавирусга қарши илк дори воситаси ҳисобланади. Жанубий Корея ҳам 1 июлдан бошлаб мазкур дори воситасини сотиб олишни бошлаганди. Ўзбекистонда ҳам профилактика, касалликнинг юқишининг олдини олиш мақсадида ишлатиш мумкин бўлган дорилар қаторида «Ремдесивир» бор. ЖССТ уни коронавирусга қарши курашда «умид уйғотувчи» дори воситаси деб атаган. Препарат коронавирус кўпайишини блоклаш хусусиятига эга эканлиги канадалик олимлар томонидан апрель ойида аниқланганди. АҚШ «Ремдесивир» препаратининг деярли барча захирасини сотиб олаётганини маълум қилганди.
АҚШ президенти Дональд Трамп ҳам коронавирусдан «Ремдесивир» дориси орқали даволанган. Америка президентини даволовчи шифокор Шон Конлининг маълум қилишича, Трампнинг организмида кислород даражаси 93 фоизгача тушиб кетганидан сўнг дексаметазон қўлланилган. Шифокорлар стероидни 3 октябрь куни «Ремдесивир» препаратининг иккинчи дозаси билан бирга қўллашни бошлаган, Трампда иккиламчи таъсирлар аниқланмаган.
Изоҳ (0)