Фарғонада шаҳар болалар шифохонасининг шошилинч тиббий ёрдам бўлими учун қурилган янги бино фойдаланишга топширилди, дея хабар берди «Дарё» мухбири Азизжон Эрматов.
Президент Шавкат Мирзиёевнинг 2018 йил июнь ойида Фарғона вилоятига ташрифи давомида берилган топшириққа кўра, вилоят соғлиқни сақлаш тизимидаги бир қатор даволаш профилактика муассасаларида қурилиш ҳамда мукаммал таъмирлаш ишлари олиб борилиши белгиланган эди. Шунга мувофиқ Фарғона шаҳар болалар шифохонаси реконструкция қилиниб, 50 ўриндан иборат уч қаватли даволаш биноси бунёд этилган.
Янги шифохона қурилишига 10 миллиард сўм маблағ сарфланган. Замонавий қиёфа касб этган уч қаватли тиббиёт маскани энг замонавий тиббий технологиялар билан жиҳозланган бўлиб, беморларга аниқ ташхис қўйиш, самарали даволаш учун барча имкониятлар яратилган. Бундай қулайлик эса пандемия шароитида болаларнинг тезкор ва зарур тиббиёт ёрдам олишида муҳим аҳамият касб этади.
Мазкур шифохонада 335 нафар малакали шифокор, ҳамшира ва кичик тиббиёт ходимлари 92 минг нафардан зиёд болаларга тиббий хизмат кўрсатади.
Тез тиббий ёрдам ҳамда патронаж хизмати сифатини янада яхшилаш мақсадида шифохонага Damas автомобили ҳам топширилган.
Изоҳ (0)