2020 йилда пандемия сабаб Москвадаги муҳожирлар сони 40 фоизга қисқариб кетди. Бу ҳақда шаҳар мэри Сергей Собянинга таяниб, «Интерфакс» хабар берди. Ўз навбатида, бу меҳнат бозори, хусусан, шаҳар хизматларига таъсир кўрсатган.
«Москвада муҳожирлар сони сезиларли даражада, 40 фоизга камайганига боғлиқ муаммо мавжуд. Бу меҳнат бозорига ва коммунал соҳага — вақтинчалик эгалланган лавозимларга таъсир кўрсатади. Бу — қўл меҳнати, белкурак, супурги, лом. Москваликларнинг аксарияти бу каби ишда ишлашга тайёр эмас», — дейди Россия пойтахти мэри.
Шу билан бирга, Собяниннинг таъкидлашича, қишки даврда кўчаларни тозалаш бўйича муаммо юзага келмайди ва ушбу масала механизация ҳамда бошқа туманлар аҳолисини жалб этган ҳолда бартараф этилади.
Аввалроқ Россия мамлакатда нолегал бўлиб турган ўзбекистонликларга 15 декабргача имтиёз бергани тўғрисида хабар берилганди.
Эслатиб ўтамиз, Россиядаги чет эл фуқароларининг ҳуқуқий мақоми тўғрисида бутунлай янги федерал қонун лойиҳаси ишлаб чиқилмоқда ва унга кўплаб ўзгаришлар киритилган. Хусусан, Россияда 30 суткадан ортиқ вақт давомида бўладиган мигрантларга бармоқ изларини топшириш, суратга тушиш, тиббий кўрикдан ўтиш ва ID-карталар олиш мажбуриятини юклаш режалаштирилмоқда.
Изоҳ (0)