Оқдарё дарёсининг Самарқанд шаҳар «Ширин» маҳалласига яқин ҳудудида «Самарқанд йўллардан мунтазам фойдаланиш» унитар корхонаси томонидан бунёд этилган кўприк фойдаланишга топширилди, дея хабар бермоқда «Халқ сўзи Online».
Кўприкнинг очилиш маросимида вилояти ҳокими Эркинжон Турдимов ҳам қатнашган.
«Самарқанд йўллардан мунтазам фойдаланиш» унитар корхонаси директори Муродхон Ҳожихоновнинг маълум қилишича, кўприк лойиҳасининг умумий қиймати 3,5 миллиард сўмни ташкил этган.
«Кўприкнинг умумий узунлиги 90 метр, эни эса 7,5 метр. 100 тоннагача юкни кўтариш қувватига эга. Кўприк карантин эҳтиёт чораларига қатъий амал қилинган ҳолда 5 ой давомида қуриб битказилди. Унга зарур маблағ корхонамиз ҳисобидан сарфланди. Кўприкка туташ дарё ёқасидаги 200 метр майдон ободонлаштирилиб, пиёдалар йўлаги ётқизилди, замонавий автобекат қурилди», – дейди Муродхон Ҳожихонов.
Қайд этилишича, мустаҳкам йўл ўтказгич бу ҳудудга яқин аҳоли учун катта қулайлик яратди.
«35 йилдан буён Холвойи қишлоғида яшайман. Самарқанд шаҳрининг «Янгиобод» маҳалласида қариндошларим, Оқдарёнинг Бошдархон қишлоғида қудаларим истиқомат қилади. Шу пайтгача уларникига бориб-келиш азоб эди. Кичкина, хавфсиз кўприкдан жонимизни ҳовучлаб ўтардик. Бугун, мана, кенг, мустаҳкам кўприк қурилди. Бундай қулайликдан мамнунмиз, қариндошларимизникига, қолаверса, бозор-ўчарга бемалол бориб келяпмиз, оғиримиз енгил, узоғимиз яқин бўлди» – дейди Гулноза Қудратова.
«Қирқ йилдан буён техника рулини бошқараман. Йиллар давомида бу ерда бирор оддий бўлса ҳам кўприк бўлмаганлиги сабабли Бошдархон қишлоғига бормоқчи бўлсак, ё Фарҳод шаҳарчасидаги кўприк орқали, ёки Оқдарёнинг Тошкент–Бухоро магистрал йўлига чиқиб, айланма йўлдан келишга мажбур бўлардик. Энди эса ҳар қандай юк билан юз метр юрсак, Бошдархонга, ундан 3 километрдан сўнг Самарқанд шаҳрига етамиз» – дейди «Ширин» маҳалласида яшовчи ҳайдовчи.
Маълум қилинишича, кўприк усти янгича дизайн билан безатилиб, кечки пайт турли рангларда ёнадиган чироқлар билан ҳам жиҳозланган.
Эслатиб ўтамиз, Сурхондарё вилоятининг Қумқўрғон туманида 6,5 миллиард сўмга қурилган кўприк 1 йил-у 7 ой хизмат кўрсатгач яроқсиз ҳолга келганди. Бу ҳолат бўйича Бош прокуратура ўрганиш олиб боришини билдирган ва қурилишда қўшиб ёзиш ҳолатлари аниқланмаганини маълум қилган.Бироқ вилоят прокуратурасининг изоҳ беришича, пудратчи ва буюртмачи ўртасида имзоланган 2014 йил 21 апрелдаги шартномада кўприк қурилишини зиммасига олган пудратчининг мажбуриятлари кўрсатиб ўтилган бўлса-да, пудратчи мажбуриятларини тўлиқ бажармаган. Бу вилоят прокуратурасига маълум бўлган. Лекин коронавирус пандемияси сабаб прокуратура тергов-суриштирув жараёнларини олиб боролмаган.
Кейинроқ маълум бўлишича, 6,5 миллиард сўмга қурилган кўприк 9,6 миллиард сўмга таъмирланадиган бўлди.
Изоҳ (0)