Қашқадарё вилоят халқ таълими бошқармасига янги раҳбар тайинланди. Бу ҳақда «Дарё»га вилоят ҳокимлиги ахборот хизмати раҳбари Аҳрор Содиқов маълум қилди.
Хабар берилишича, халқ таълими вазири Шерзод Шерматов 2020 йилнинг 19 октябрь куни вилоятда бўлиб, халқ таълими масъуллари билан йиғилиш ўтказган. Йиғилишда 2020 йилнинг март ойидан буён бошқарма бошлиғи лавозимида ишлаб келган Абдуғани Ҳимматов ўрнига Фарҳод Очилов тайинланган.
Қайд этилишича, Фарҳод Очилов бошқармага раҳбар этиб тайинлангунига қадар, «Юксалиш» умуммиллий ҳаракатининг вилоят бўлинмаси раҳбари лавозимида ишлаб келган.
Аҳрор Содиқовнинг қўшимча қилишича, вилоят ҳокими Зоир Мирзаев иштирокидаги йиғилишда бошқарма бошлиғи Фарҳод Очилов жамоатчиликка таништирилиб, Қарши шаҳар халқ таълими бўлимига тайинланган янги раҳбар ҳақида ҳам маълумот берилган.
Қарши шаҳар халқ таълими бўлимининг ижтимоий фанлар услубчиси лавозимида ишлаб келган Наргиза Самадова эндиликда Қарши шаҳар халқ таълими бўлимини бошқариши айтилган.
Қарши шаҳар халқ таълими бўлими раҳбарлигидан вилоят халқ таълими бошқармаси бошлиғи лавозимига тайинланган Абдуғани Ҳимматов Деҳқонобод туман халқ таълими бўлими раҳбари лавозимида ишлаган кезларда катта миқдорда камомад қилишда айбланиб, терговга жалб қилинган. Вилоят прокуратурасининг аниқлик киритишича, тергов якунлангач Абдуғани Ҳимматов нимада айблангани очиқланади.
Изоҳ (0)