Индиана штатининг Фишерс шаҳрида маҳаллий балиқчилардан бири «Гейтс» сув омборидан 32 йил олдин ўғирлаб кетилган Chevrolet Camaro’ни топиб олди, деб хабар беради Motor.
Балиқчининг топилмаси тўғрисида хабар топган маҳаллий полиция ҳодиса жойига ғаввосларни жўнатган. Полиция маълумотларга кўра, балиқчи автомобилни ўзининг гидролокатори — акустик тўлқинлар орқали сув остидаги объектларни овоз ёрдамида аниқловчи восита кўмагида аниқлаган.
Ғилдираклари осмонга қараб ётган автомобиль лой ва сув ўтлари билан қопланган. 1987 йилда ишлаб чиқарилган Chevrolet Camaro ғаввослар ва кўтарма кран ёрдамида сув остидан чиқариб олинган. Ўттиз йил сув остида ётган машина жуда ёмон аҳволда.
Қизиқарли жиҳати, автомобиль ётган кўприк бундан 15 йил олдин таъмирланган. Шунга қарамай ишчилар автомобилни пайқамаган.
Полициячиларнинг аниқлашича, ушбу автомобиль ўғирлаб кетилган бўлиб, унинг эгаси ҳам оламдан ўтиб кетган.
Аввалроқ Австралияда икки йил олдин океанга чўкиб кетган бир жуфт Chevrolet Silverado сувдан чиқариб олингани тўғрисида хабар берилганди.
Изоҳ (0)