Германиянинг имкониятлари чексиз эмас, ва унинг иқтисодиёти коронавирус тарқалиши оқибатида баҳорда ҳукумат томонидан жорий қилишга мажбур бўлинган чекловларни такрорлашга тайёр эмас. Бу ҳақда Германия канцлери Ангела Меркель федерал ўлкалар бош вазирлари билан учрашув якунлари бўйича матбуот анжуманида айтиб ўтди, деб ёзади «РБК».
Унинг эслатишича, Германия қабул қилган бюджет фақат шу йилнинг ўзида 250 миллиард евро миқдоридаги қарздорликни назарда тутади. «Шу туфайли биз коронавируснинг баҳордагидек, худди шундай иқтисодий оқибатларни келтириб чиқарувчи иккинчи тўлқинини ўзимизга эп кўра олмаймиз», — деди у.
Канцлер қайд этишича, мамлакат касалланганлар сонининг экспоненсиал ўсиши босқичида бўлиб, тўлқинни пасайтириш учун бор кучини ишга солиши керак. «Яқин кунлар ва ҳафталарда кўрадиган чораларимиз биз пандемияни қандай енгиб ўтишимизда ҳал қилувчи аҳамиятга эга бўлади. Касалланганлар сонини назорат қилиш ва уларнинг бошқалар билан контактларини аниқлаш учун қўлдан келганча ҳаракат қилиш керак», — деди Меркель.
Йиғилишда канцлер ва бош вазирлар касалланиш ҳолатлари ўсишда давом этган тақдирда қандай чекловлар киритилиши ҳақида келишиб олди. Энг мураккаб эпидемиологик вазиятга эга ҳудудларда (етти кун ичида 100 минг аҳолига 50 та касалланиш ҳолати) ўн нафардан ортиқ кишининг тўпланиши тақиқланади. Бундай жойларда паб ва ресторанлар фақат 23:00 гача ишлайди, шунингдек, жамоат жойларида ниқоб тақиш талаблари кучайтирилиши мумкин.
Германиянинг баъзи шаҳарларида, шу жумладан, Берлинда аллақачон кучайтирилган хавфсизлик чоралари амал қилмоқда. Ўтган ҳафтадан бошлаб дўконлар, барлар, ресторанлар ва клубларнинг 23:00 дан 6:00 гача иш режими чекланди. Ўн нафардан ортиқ киши иштирокида тадбирлар ўтказиш тақиқланди. Чекловлар 31 октябргача амал қилади.
Изоҳ (0)