Тоғли Қорабоғдаги жанговар тўқнашувларда 52 нафар суриялик ёлланма жангчи ҳалок бўлган, деб хабар беради «РБК» The Washington Post’га таяниб.
Маълум бўлишича, октябрь бошида уларнинг жасадлари Сурия-Туркия чегара постида қариндошларига топширилган. Марҳумлар Сурияда Туркия томонидан қўллаб-қувватланувчи ҳарбий гуруҳлар томонидан Озарбайжон томонда туриб Арманистон билан жанг қилиш учун ёлланган.
Озарбайжон президенти Илҳом Алиев эса France 24 телеканалига берган интервьюсида Боку томонидан Тоғли Қорабоғдаги низоларда ёлланма жангчилар қўлланилгани юзасидан ҳеч бир давлат далил келтира олмаганини айтди. Унинг сўзларига кўра, Озарбайжон армияси ўз мақсадларига ўзи эриша олади.
«Фикримча, агар ҳеч қандай далил-исбот бўлмаса, бу миш-мишлар ўтмишда қолиши керак. Бизда ёлланма жангчилар йўқ. Бу — бизнинг расмий баёнотимиз», — деди Алиев.
Аввалроқ Франция президенти Эммануэль Макрон Париж Тоғли Қорабоғдаги жанговар ҳаракатларда суриялик жангарилар қатнашаётгани ҳақида аниқ маълумотга эга эканлигини айтган эди.
Сурия ва Ливиядан ёлланма жангчиларнинг Қорабоғга кўчириб ўтказилгани ҳақида маълумотлар борлигини Россия ТИВ ҳам хабар қилган эди. Бунда гап жанговар ҳаракатларда пул учун қатнашишни режалаштираётган минглаб жангарилар ҳақида бормоқда.
Эслатиб ўтамиз, The Wall Street Journal газетаси ҳам Суриядаги манбаларига таяниб, Тоғли Қорабоғга Туркияга алоқадор юзлаб суриялик жангарилар кўчириб ўтказилганини хабар қилган эди.
Тоғли Қорабоғда кенг қамровли жанговар ҳаракатлар 27 сентябрдан буён давом этмоқда. Озарбайжон ва Арманистон 10 октябрь куни соат 12:00 дан бошлаб Тоғли Қорабоғда ўт очишни тўхтатиш тўғрисида келишиб олганди. Аммо шу куни кейинроқ Арманистон ва Озарбайжон Мудофаа вазирликлари бир-бирини Тоғли Қорабоғда ўт очишни тўхтатиш режимини бузишда айблади.
Изоҳ (0)