Ўзбекистоннинг «МС РемТех» МЧЖ корхонаси базасида турли моделдаги «Урал» ҳарбий автомобилларини йиғиш режалаштирилмоқда. Бу ҳақда Давлат мудофаа саноати қўмитаси матбуот хизмати маълум қилди.
Қўмита хабарига кўра, мазкур лойиҳа ҳарбий ва икки мақсадда фойдаланиладиган юк автомобилларини Ўзбекистонда ишлаб чиқаришни янада диверсификация қилиш ва соғлом рақобат муҳитини яратишига хизмат қилади.
Таъкидланишича, Қуролли кучлар бўлинмаларининг моддий-техник базасини янада такомиллаштириш, тезкорлиги ва мобиллигини ошириш мақсадида уларни замонавий ҳарбий автомобиль техникалари билан таъминлаш ишлари олиб борилмоқда. Қўшинларнинг юқори талабларига жавоб берадиган ҳарбий техникаларидан бири «Урал» автомобили ҳисобланади. Ҳарбий мақсадлар учун ишлаб чиқарилган «Урал» автомобиллари ҳозирда 40 дан ортиқ давлатларнинг қуролли кучларида эксплуатация қилиниб, унинг шассисига 400 га яқин турли устқурмалар ўрнатилган.
«Шассининг кенг кўламли мақсадларда фойдаланиш имкониятини берувчи конструктив ўзига хос хусусияти, трансмиссиясининг пишиқ-пухта ишланганлиги автомобилни ҳар қандай йўл шароитларида ишончли ҳаракатлана олиши ҳамда узоқ вақт ва ортиқча сарф-харажатларсиз эксплуатация қилинишига олиб келди» — дейилади Давлат мудофаа саноати қўмитаси хабарида.
Таъкидланишича, ўзининг энг яхши тавсифларини сақлаб қолган ҳолда бугунги кунда «Урал» автомобиллари замон талабларига мос равишда такомиллаштирилиб борилмоқда.
Қўмитада 2015 йилдан бошлаб ишлаб чиқарилаётган 4х4 ва 6х6 ғилдираклар формуласига эга бўлган тўлиқ узатмали «Урал NEXT» ва «Урал М» янги модификацияли автомобиллар тақдимоти бўлиб ўтди.
Қайд этилишича, ушбу автомобиллар ташқи кўринишидан ташқари бир қанча конструктив ўзгаришларга эга бўлди.
Қўмита томонидан қўшимча қилинишича, «МС РемТех» МЧЖ Мудофаа вазирлигининг собиқ 14-автомобилларни таъмирлаш заводи бўлиб, мазкур заводда «Урал» автомобиллари йиғилган. Ҳозирда у ерда мазкур автомобилларни капитал таъмирлаш амалга оширилмоқда.
Изоҳ (0)