Навоийда «Одноклассники» орқали диний-экстремистик материалларни виртуал дўстларига тарқатиб келган 1994 йилда туғилган Л.С. (исм-фамилияси ўзгартирилган)га нисбатан 12 октябрь куни Жиноят ишлари бўйича Навоий вилоят Учқудуқ туман суди биносида жиноят иши кўриб чиқилди. Бу ҳақда «Даракчи» хабар бермоқда.
Судланувчи йигит 2013 йилда «Одноклассники» ижтимоий тармоғида ўз исми-шарифи билан профил очган ва мазкур профил орқали виртуал дўстлари билан суҳбатлашиб, Ўзбекистонда анъанавий бўлган ҳанафийлик мазҳаби ва мотрудийлик ақидасига зид бўлган ва аҳоли орасида ваҳима чиқаришга қаратилган диний-экстремистик материаллар — турли хилдаги видео ва аудиоларга «класс» белгисини босиш орқали виртуал дўстларига тарқатиб келган.
Вазирлар Маҳкамаси ҳузуридаги дин ишлари бўйича қўмита экспертизасининг экспертиза хулосасига кўра, видеофайлда халқаро террористик ташкилотнинг етакчиларидан бирининг жиҳод ҳақидаги фикрлари ўрин олган маъруза бўлган.
Шунингдек, бир нечта видеофайлларда инсон бир вақтнинг ўзида ҳам мусулмон, ҳам демократ бўла олмаслиги, инсон ёки демократ, ёки мусулмон бўлиши, демократ ҳурриятни даъво қилса-да, ислом аҳлига ўз ҳайтларини шариат асосига қурилишига йўл қўймаслиги, мусулмонга ҳаётини ўз юртида шариат асосида қуришга йўл берилмаса, ҳижрат қилиш кераклиги ҳақида ёзилган турли маърузалар ақидапарастлик ғоялари билан йўғрилган бўлган. Ушбу материалларни Ўзбекистонга олиб кириш, тайёрлаш ва тарқатиш тақиқланган.
Судланувчига Жиноят кодекси 244-1-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисмининг «г» банди билан Жиноят кодексининг 57-моддаси (енгилроқ жазо)ни қўллаб, 3 йил муддатга озодликни чеклаш жазоси тайинланган.
Изоҳ (0)