Мексикалик эркак тўфон вақтида 300 га яқин бошпанасиз ҳайвонни ўз уйига жойлаштирди

Мексикадаги Tierra de Animales номли бошпанасиз ҳайвонларни сақлаш ташкилотида ишлайдиган Рикардо Пиментал исмли эркак тўфон пайтида ўз уйида 300 та жонзотни яширди, деб ёзади Bored Panda нашри.

Одатдаги вақтда бошпанасиз ҳайвонлар сақланадиган ташкилот биноси ўз вазифасини бемалол бажара олади, бироқ 5 октябрь куни мамлакатга «Дельта» тўфони ёпирилган.

Пиментал барча ҳайвонлар бинога сиғмаслигини англаб, уларни ўз уйида ҳимоя қилишга қарор қилган.

Натижада унинг уйида итлар, мушуклар, эчки ва товуқлардан иборат катта компания йиғилган. У жами 300 га яқин жонзотни «таклиф этган».

«Улар кечаси ўзини жуда яхши тутди. Ҳайвонларнинг барчаси стерилланган, эмланган ва дегельминтизация қилинган. Уларнинг барчаси янги оиласига бориш учун тайёр», — дейди Пиментал.

Эркакнинг сўзларига кўра, тўфондан сўнг ташкилотга янада кўпроқ хайрия зарур бўлади, чунки улар каттароқ бошпана қуришни режалаштирмоқда.

«Мен ҳайвонлар ҳаётини ёшлигимдан сақлаб келган, тўққиз йил олдин эса Tierra de Animales’га асос солдим. Биз нафақат итларни, балки мушуклар, тошбақалар, игуана, сигир, қўй, эчки, чўчқа, от, эшакларни ҳам қутқарамиз», — дейди эркак.

5 октябрь куни ёпирилган «Дельта» тўфони 12 октябрга қадар давом этган. Таъкидланишича, унинг тезлиги соатига 230 километрга етган.