Шерзод Кудбиев қўл остидаги ходимни ҳақорат қилаётгани қайд этилган аудиоёзувга изоҳ берди

Ўзбекистон Давлат солиқ қўмитаси раиси Шерзод Кудбиев ижтимоий тармоқларда тарқалган ва қўл остидаги ходимига ҳақоратли сўзлар билан танбеҳ бергани акс этган аудиёзувга изоҳ берди.

Ижтимоий тармоқларда тарқалган аудиоёзувда қўмита раҳбари ўз ходимини берилган топшириқни бажармагани учун баъзи ҳақоратли сўзлар билан уришаётганини эшитиш мумкин.

Шунингдек, аудиоёзув билан бирга ижтимоий тармоққа жойланган видеода қўмита раҳбари ҳеч қандай асосларсиз Давлат солиқ қўмитасининг биносида қайта таъмирлаш ишларини олиб бораётгани айтилган.

«Аудиоёзувдаги кескин фикрлар ва Alter Ego лойиҳасига берилган интервью борасида: Мен раҳбар шахс оғир вазиятларда ҳам вазминлик билан ҳаракат қилиши лозимлиги тўғрисидаги фикримда қатъий тураман ва юқоридаги ҳолатда ўзим шу фикрга қарши ҳаракат қилганимни тан оламан. Юзага келган вазиятда масъулиятни ҳис қилган ҳолда мен юқоридаги ходим билан алоҳида суҳбатлашдим ва биз биргаликда ёқимсиз ҳодисага тўлиқ барҳам бердик. Лекин бу мени масъулиятдан фориғ қилмайди», — дейилади Шерзод Кудбиевнинг изоҳида.

Шерзод Кудбиевнинг сўзларига кўра, биноларни реконструкция қилиш ва Давлат солиқ қўмитасининг моддий-техник базасини мустаҳкамлашга қаратилган бошқа тадбирларнинг ҳар бири бўйича қонуний асос мавжуд ва бу жараёнлар тегишли назорат органларининг кузатуви остида амалга оширилмоқда.

«Видеонинг тарқалиши борасида қуйидагиларни айтиб ўтмоқчиман.

Ҳеч кимга сир эмаски, солиқ тизимида ислоҳотлар бошланган, шу билан бирга, жуда кўп муаммолар йиғилиб қолган. Афсус билан айтиш керакки, ҳалигача айрим ҳолатларда тадбиркорларга нисбатан ‘соғин сигир’ сифатида қараб, уларнинг ҳисобидан ўз хизмат вазифаларини, энг ёмони — айрим ҳолларда эса шахсий манфаатларини кўзлаётган шахслар учраб турибди.

Юқоридаги видеода айнан шундай ҳолатлар муҳокама қилинган эди. Биринчи ҳолатда — тадбиркорга ортиқча тўланган ҚҚС суммаси ўз вақтида қайтарилмаган, иккинчи ҳолатда — асоссиз равишда ҳисоб-рақам банд қилиниб, ундаги маблағлар ундирилмоқчи бўлган.

Масаладан яқиндан хабардор бўлганлар яхши биладики, ходимларнинг бундай масъулиятсиз хатти-ҳаракатлари видеода айтиб ўтилган иккала ташкилотнинг ҳам фаолияти тўхтатилиши каби жиддий оқибатларга олиб келган эди. Ҳозирда ушбу корхоналарнинг фаолияти тўлиқ қайта тикланишига эришилди.

Афсуски, бугунги кунда бу каби масалаларни ҳал этишда шахсан менинг аралашувим талаб этилмоқда», — дея таъкидлаган Шерзод Кудбиев.

ДСҚ раисининг маълум қилишича, яқин келажакда солиқ органлари томонидан тадбиркорлар фаолиятига қасддан ёки тасодифан аралашув имкониятини бутунлай йўққа чиқарадиган янги тизимни ишлаб чиқиш устида иш олиб борилмоқда. «Бундай янгиликлар кимгадир ёқади, кимгадир эса йўқ. Тизимдаги ўзгаришларга қарши бўлганлар турли усуллар билан ўзгаришларга қаршилик қилишга ҳаракат қилади», — дея қўшимча қилган Кудбиев.

«Лекин барча тушуниши керакки, биз олдимизга солиқ тизимини тадбиркорларга кўмак берадиган тизимга айлантириш бўйича аниқ мақсад қўйганмиз.

Бу жуда мураккаб жараён бўлади ва ҳамма ҳам биз билан бу йўлни охиригача бирга босиб ўтолмаслиги мумкин, ким биландир хайрлашишга тўғри келади, ким биландир аллақачон хайрлашдик. Лекин бир масалада ишончим комилки, ходимларимизнинг катта қисми ушбу ўзгаришларни тўлиқ қўллаб-қувватлайди ва уларни амалга оширишда фаол иштирок этади», — деган Шерзод Кудбиев.

Қўмита раҳбарининг билдиришича, юқоридаги ҳолат бўйича қўмита ҳайъатининг навбатдан ташқари йиғилиши ўтказилган. Унда юқоридаги масалалар атрофлича муҳокама қилинган ва ташкилот фаолиятини янада яхшилаш бўйича хулосалар қилинган.