Видео: Картошкага уланган калкульятор ёрдамида ишга туширилган Doom ўйини

Reddit тармоғи фойдаланувчиси картошкадан олинган электр энергиясидан фойдаланиб, калькуляторда Doom ўйинини ишга туширди. Ташаббускор йигит ўзининг тажрибаси ва унга тайёргарлик кўриш жараёни тасвирланган видеони YouTube’даги каналига жойлаштирган.

Блогер компьютер ўйинини ҳисоблаш қурилмасига мослаштиришга ҳамда занжир кўринишида бир-бирига уланган картошкалардан чиқаётган электр энергиясини созлашга муваффақ бўлган. Видеодан кўриш мумкинки, интерфейс ва геймплей 1993 йилда тақдим этилган ўйинга тегишли. Бошқарув эса TI-84 Plus моделидаги калькулятор тугмалари ёрдамида амалга оширилган.

Шунингдек, муаллиф қандай қилиб калькуляторда Doom’ни ишга туширганини сўзлаб берган. Унинг сўзларига кўра, блогер дастлаб ўйинни Raspberry Pi Zero бир платали компьютерида синаб кўрмоқчи бўлган ва шу мақсадда 200 та картошкани бир-бирига занжир кўринишида улаб чиққан. Бироқ компьютерни ишга туширишнинг имкони бўлмаган, чунки у анча барқарор электр манбайини талаб этган. Шу сабабли Reddit фойдаланувчиси энергия камроқ талаб этадиган калькуляторни қидириб топган.

Блогернинг таъкидлашича, тажриба бир ҳафтагача чўзилган. Мустақил энергия манбайини ҳосил қилиш учун ролик муаллифи 770 та картошка бўлагининг ҳар бирига мих ва танга тиқиб чиққан.