Reddit tarmog‘i foydalanuvchisi kartoshkadan olingan elektr energiyasidan foydalanib, kalkulyatorda Doom o‘yinini ishga tushirdi. Tashabbuskor yigit o‘zining tajribasi va unga tayyorgarlik ko‘rish jarayoni tasvirlangan videoni YouTube’dagi kanaliga joylashtirgan.
Bloger kompyuter o‘yinini hisoblash qurilmasiga moslashtirishga hamda zanjir ko‘rinishida bir-biriga ulangan kartoshkalardan chiqayotgan elektr energiyasini sozlashga muvaffaq bo‘lgan. Videodan ko‘rish mumkinki, interfeys va geympley 1993-yilda taqdim etilgan o‘yinga tegishli. Boshqaruv esa TI-84 Plus modelidagi kalkulyator tugmalari yordamida amalga oshirilgan.
Shuningdek, muallif qanday qilib kalkulyatorda Doom’ni ishga tushirganini so‘zlab bergan. Uning so‘zlariga ko‘ra, bloger dastlab o‘yinni Raspberry Pi Zero bir platali kompyuterida sinab ko‘rmoqchi bo‘lgan va shu maqsadda 200 ta kartoshkani bir-biriga zanjir ko‘rinishida ulab chiqqan. Biroq kompyuterni ishga tushirishning imkoni bo‘lmagan, chunki u ancha barqaror elektr manbayini talab etgan. Shu sababli Reddit foydalanuvchisi energiya kamroq talab etadigan kalkulyatorni qidirib topgan.
Blogerning ta’kidlashicha, tajriba bir haftagacha cho‘zilgan. Mustaqil energiya manbayini hosil qilish uchun rolik muallifi 770 ta kartoshka bo‘lagining har biriga mix va tanga tiqib chiqqan.
Izoh (0)