Сирдарёда уй эгаси газ учун қарздорликни сўндиришга келган назоратчини ўлдириб қўйди

Сирдарё вилояти Сирдарё туман газ назоратчисини хонадон эгаси ўлдириб қўйди, дея хабар бермоқда туман ИИБ.

Маълум қилинишича, 2020 йил 9 октябрь куни соат 18:50 да фуқаро Ф.К. Сирдарё тумани ИИБга оғзаки хабар берган. Унга кўра 2020 йил 9 октябрь куни соат тахминан 18:00 ларда Сирдарё тумани «Дўстлик» МФЙдаги хонадонига ўзини Сирдарё туман газ назоратчиси деб таништирган фуқаро Қ.Ш. келиб газ ҳисоблагичини текшириб, ундан фойдаланилган газ учун қарздорлигини сўндиришни сўраган.

Шундан сўнг фуқаро Ф.К. ва газ назоратчиси ўртасида ўзаро келишмовчилик чиқиб, тортишиб, муштлашган. Натижада фуқаро Ф.К. ёнида бўлган ошхона пичоғи билан фуқаро Қ.Ш.ни баданининг бир нечта жойларига уриб тан жароҳати етказган.

Оқибатда фуқаро Қ.Ш. олган тан жароҳатлари билан воқеа жойида вафот этган.

Мазкур ҳолат юзасидан Сирдарё туман прокуратураси томонидан терговга қадар текширув ҳаракатлари олиб борилмоқда.