Бухоро вилоятида ўрдак овлаб, қилмиши фош бўлгач ўлжасини яширишга уринган браконьерлар қўлга олинди. Бу ҳақда «Дарё»га вилоят Экология ва атроф-муҳитни муҳофаза қилиш бошқармаси экология соҳасидаги назорат инспекцияси бошлиғи ўринбосари Жаҳонгир Наврўзов хабар берди.
Таъкидланишича, 11 октябрь куни Жондор туманидаги «Қумсултон» табиий сув ҳавзасида вилоят Экология ва атроф-муҳитни муҳофаза қилиш соҳаси бўйича назорат инспекцияси мутахассислари ҳамда вилоят Миллий гвардия бошқармаси ходимлари ҳамкорлигида тунги рейд ўтказилган.
Браконьерларнинг тартибсиз хатти-ҳаракати ҳуқуқ-тартибот идоралари вакилларини сергаклантирган. «Қумсултон» табиий сув ҳавзасидан тўққиз бош ўрдак овлаган фуқаролар — Х.И ва Р.А. ҳуқуқ-тартибот идоралари ходимларини кўриб, «ўлжа»сини яшириб, қочишга уринган. Бироқ бу натижа бермаган.
Ов милтиғи билан рухсатсиз, яширин равишда ов қилган браконьерлар Маъмурий жавобгарлик тўғрисидаги кодекснинг 90-моддаси 1-қисми (Ов қилиш ва балиқ овлаш қоидаларини, шунингдек, ҳайвонот дунёсидан фойдаланишнинг бошқа турларини амалга ошириш қоидаларини бузиш) билан айбланиб, жаримага тортилган.
Изоҳ (0)