Ўзбекистон Президенти Шавкат Мирзиёев 12 октябрь куни интеллектуал мулк объектларини муҳофаза қилиш тизимини такомиллаштириш чора-тадбирлари юзасидан йиғилиш ўтказди.
Президент томонидан таъкидланишича, илм-фан ютуқларини юқори қўшилган қиймат маҳсулотига айлантириш энг асосий вазифа ҳисобланади. Дунё тажрибасига кўра, маҳсулотларнинг бренд қиймати айрим минтақаларнинг ялпи ички маҳсулотидан бир неча марта баланд туради.
Давлат раҳбарининг сўзларига кўра, кўп соҳаларда бўлгани каби илм соҳасида ҳам кооперацияни йўлга қўйиб, Ўзбекистон брендини яратиш мумкин. Ҳар бир давлат идораси интеллектуал мулк бўйича ўз ҳисоботини берадиган институционал тизимни яратиш керак.
Йиғилишда Шавкат Мирзиёев 2020 йил якунига қадар ихтиролар, фойдали моделлар, саноат намуналари, селексия ютуқларининг «электрон ярмаркасини» ташкил этиб, патент эгаларини тадбиркорлар билан боғлаш бўйича кўрсатма берди.
Шунингдек, бир ой муддатда интеллектуал мулк соҳасини тубдан яхшилаш ва уни барча соҳаларга олиб киришни назарда тутувчи қарор лойиҳасини тайёрлаш бўйича топшириқ берилди. Тармоқлар, ҳудудлар, илмий ташкилотлар, олийгоҳлар бўйича энг камида уч йиллик дастур ишлаб чиқиш зарурлиги таъкидланди.
Бундан ташқари, давлат раҳбари интеллектуал мулк эгаларининг харажатларини қоплаш, патент эгаларига имтиёзлар бериш тизимини жорий этиш кераклиги айтди. 2020 йил охиригача камида 100 та, 2021 йилда 500 та маҳаллий брендни халқаро рўйхатга олишни ташкил этиш кераклиги таъкидланди.
«Нима учун мен буни қиляпман? Бозор топиш учун қиляпман. Бозор иқтисодиёти деб гапиряпмиз. Бу (бренд) бўлмаса, бирорта инвестор келмайди Ўзбекистонга. Иккинчидан, маҳсулот бренд бўлмаса, бозор топа олмайди. Бу ерда ҳам кураш, шу курашга муносиб ҳаракат қилишимиз керак. Агар интеллектуал мулк масаласини давлат сиёсати даражасига кўтармасак, Ўзбекистон 10 йилдан кейин ҳам рақобатдош бўлмайди», — деди Шавкат Мирзиёев.
Изоҳ (0)