Беларусь полицияси ходимлари ва ҳарбий хизматчилари кўчаларни тарк этишмайди ва, агар керак бўлса, махсус воситалар ва жанговар қуроллардан фойдаланишади. Бу ҳақда «БелТА» ахборот агентлиги ички ишлар вазирининг биринчи ўринбосари — Беларусь криминал милицияси бошлиғи Геннадий Казакевичнинг сўзларига таяниб, маълум қилди.
Вазирнинг биринчи ўринбосари сўзларига кўра, ИИВ ҳудудлардаги норозилик ҳаракатлари пасайиб бораётганини, аммо улар Минскка кўчиб, янада радикаллашаётганини айтмоқда. «Минскда содир бўлган якшанба кунги ҳаракатлар бунга ёрқин далилдир», — дея таъкидлайди у.
«Ҳатто кундузи ва кечқурун ҳам у ерда тошлар, бутилкалар учаётган эди, пичоқлар ва чархлар бор эди. Кечга келиб эса баррикадалар ва ёнаётган шиналар пайдо бўлди. Бунинг фуқаролик намойишларга алоқаси йўқ. Биз нафақат тажовузга, балки жангарилар, радикаллар, анархистлар, футбол фанатлари тўдаларининг август бошидаги воқеаларни такрорлашга бўлган уринишларига дуч келдик», — дейди Геннадий Казакевич.
Беларусда президент сайловлари натижаларидан норози бўлган фуқаролар намойишлари бошланганига икки ойдан ошди. Якшанба куни бўлиб ўтган намойишларда бутун республика бўйлаб 700 дан ортиқ киши ҳибсга олинган. Намойишчиларга қарши товушли гранаталар ва сув пуркагичлар ишлатилган. Маъмурий ҳуқуқбузарликлар тўғрисидаги ишларни судда кўриб чиқишдан олдин 570 киши қамоққа жойлаштирилди.
Аввалроқ Лукашенко ҳибсдаги мухолифат вакиллари билан учрашув ўтказгани тўғрисида хабар берилганди.
Мавзуга доир:
Беларусь Марказий сайлов комиссияси маълумотларига кўра, Светлана Тихановская президентлик сайловида 10,1 фоиз овоз тўплаган. Тихановскаянинг ўзи эса мағлубиятини тан олмади ва ўзини «Беларусь халқи томонидан сайланган ягона етакчи» деб атади. Сайловдан икки кун ўтгач Тихановская Литвага чиқиб кетган. Унинг сафдошлари Тихановская ҳукумат босими остида мамлакатдан чиқиб кетганини маълум қилган.
Изоҳ (0)